මුලින්ම මසාලා වඩේ සකසාගෙන ඉමු. ඒ සඳහා කඩල පරිප්පු ග්‍රෑම් 250ක්, අමු මිරිස් කරල් 3ක්, බීලූනු ගෙඩියක්, කරපිංචා, සුදුලූනු බික් 3ක්, රස අනුව ලුණු සහ පොල් තෙල් අවශ්‍යයි.

විනාඩි 20ක් පමණ පොඟවා ගත් කඩල පරිප්පු වතුර ඉවත්වන සේ පෙරා ගන්න.

ඉන්පසු එය කෑලි සිටින සේ අඹරා පසෙකින් තබා ගන්න.

පසුව හීනියට කපාගත් අමු මිරිස්, බීලූනු, කරපිංචා, සුදුලූනු එක්කර රස අනුව ලුණු ද ඊට එකතුකර ගන්න.

මෙසේ සාදාගත් මිශ්‍රණයෙන් බෝල කිහිපයක් සාදා මඳක් තුනීකර ගන්න. ඉන්පසු ඒවා රත්වූ ගැඹුරු තෙලෙහි හොඳින් දමා හොඳින් බැදගන්න.

මසාලා වඩේ එකක හරිම රසය විඳින්න නම් තක්කාලි චට්නි එකකුත් තියෙන්නම ඕනේ. තක්කාලි චට්නි සඳහා තක්කාලි ගෙඩි 3ක්, බැදගත් රට කජු මේස හැඳි 2ක්, වියළි මිරිස් කරල් 4ක්, බීලූනු ගෙඩියක්, රස අනුව ලුණු, අබ සහ කරපිංචා අවශ්‍යයි.

තක්කාලි, බැදගත් රටකජු, වියළි මිරිස්, බීලූනු හා රස පදමට ලුණු එක්කර බ්ලෙන්ඩර් කරගන්න.

පසුව භාජනයක් ළිප තබා එයට තෙල් දමා තෙල් රත්වූ පසු අබ හා කරපිංචා දමා තෙම්පරාදුකර ගන්න.

ඉන්පසු අඹරා ගත් මිශ්‍රණය ද එයට එකතුකර කලවම්කර ගන්න.

Tharunie