වම්බටු මෝජුව හදන්න වම්බටු ග්‍රෑම් 500ක්, රතුලූනූ ග්‍රෑම් 250ක්, අමු මිරිස් ග්‍රෑම් 100ක්, සුදුලූනූ බික් 4ක්, ඉඟුරු කෑල්ලක්, විනාකිරි මේස හැඳි 3ක්, අබ කුඩු තේ හැඳි 2ක්, කහ කුඩු තේ හැඳි 1ක්, මිරිස් කුඩු තේ හැඳි 1ක් සීනි මේස හැඳි 2ක්, ලුණු කුඩු තේ හැඳි 1 සහ පොල් තෙල් අවශ්‍යයි.

මුලින්ම වම්බටු සෝදලා හීනි පොඩි තීරුවලට කපලා කහ පොඩ්ඩක් අතගාලා පැත්තකින් තියාගන්න. ඊට පස්සේ රතු ලූනූ හෝදලා සුද්දකර ගන්න. අමු මිරිස් දිග අතට මැදින් දෙකට පළාගන්න.

සුදුලූනූ , ඉඟුරු හොඳට තළලා තලපයක් හදාගන්න. සුදුලූනූ ඉඟුරු පේස්ට් එක වුණත් මේකට එකතුකර ගන්න පුළුවන්.

දැන් වම්බටු ටික රන්වන් පාට වෙනතුරු බදින්න. බැදගත්තට පස්සෙ වම්බටුවල තෙල් ටික බේරෙන්න තියන්න. රතුලූනූ ගෙඩි ටිකත් ගැඹුරු තෙලේ විනාඩියක් විතර බැදලා තෙල් ටික බේරෙන්න තියන්න.දිග අතට කැපූ අමු මිරිසුත් ගැඹුරු තෙලේ පොඩ්ඩක් බැදලා තෙල් ටික බේරන්න.

දැන් මැටි භාජනයක් ළිපේ තියලා ඒකට විනාකිරි දාලා රත්වීගෙන එනකොට ඉඟුරු සුදු ලූනූ තලපය, අබ කුඩු, මිරිස් කුඩු, සීනි, ලුණු කුඩු එකතුකරලා හොඳට හැඳිගාන්න.

දැන් අපි කලින් බැදගත්ත වම්බටු, රතුලූනූ, අමු මිරිස් එකතු කරලා පොඩි වෙලාවක් විනාකිරෙන් තැම්බෙනකම් කලවම් කරලා ළිපෙන් බාගන්න.

සීනි, ලුණු රස අනුව අඩු වැඩිකර ගන්න පුළුවන්. දවස් තුන හතරක් තියාගෙන කන්න පුළුවන්. තව ඕනි නම් රස වෙන්න උම්බලකඩ, හාල්මැස්සන් එකතු කරන්නත් පුළුවන්. හැබැයි මේ වෙසක් සමය කියන්නේ නිර්මාංසව සැදැහැ සිතින් ගත කරන කාලයක්නේ. ඒ නිසා ඒවා එකතුකර ගැනීම අවශ්‍යම නැහැ.

-Tharunie