මේ දිනවල අපට පුරුදු විදියට ආහාර ගන්න තරමක් අපහසුයි. ඒත් පෝෂණය ගැන නොහිතා ආහාර ගන්නත් බැහැ. ගෙවත්තෙන් සපයා ගත හැකි දෙයින් රස ගුණ පිරි පෝෂණීය ආහාර වේලක් සකසා ගැනීමයි කළ යුත්තේ. මේ නිවිති පපඩම් නිවිති කන්න අකැමැති පොඩ්ඩන්ට වුණත් නිවිති කන්න කැමැත්තක් ඇති කරාවි.

නිවිති කොළ කිහිපයක්

කඩල පිටි ස්වල්පයක් ( නිවිති කොළ ගන්නා ප්‍රමාණයට අනුව ගත යුතුයි) කඩලපිටි නැතිනම් පාන් පිටි වුවද ගත හැකියි.

කෝන් පිටි මේස හැඳි දෙකක් පමණ (මෙය අවශ්‍යම නොවේ. කැමැති නම් ඒ වෙනුවට බිත්තර භාවිත කළ හැකියි.)

රස අනුව ලුණු

ගම්මිරිස් කුඩු ස්වල්පයක්

පොල්තෙල්

පළමුවෙන් ම නිවිති කොළ පිරිසුදුකර සෝදා ජලය ඉවත් කරගන්න. ඔබට ඇත්තේ ලොකු නිවති කොළ නම් ඒවා අවශ්‍ය ප්‍රමාණයට කපා ගන්න.

දැන් කඩල පිටි හෝ පාන් පිටි, කෝන් පිටි හෝ බිත්තර, ලුණු හා ගම්මිරිස් කුඩු ආදිය බඳුනකට දමන්න. මේ බඳුනට වතුර ස්වල්පය බැගින් දමා තරමක් උකු බැටරයක් සාදා ගන්න.

තාච්චියකට තෙල් දමා රත්වෙන්නට ළිප තබන්න. දැන් සාදා ගත් බැටරයට නිවිති කොළ දමා බැටරයේ දවටා ගැඹුරු තෙලේ බැද ගන්න.

අමුත්තන් පැමිණි වේලාවකටත් මෙවැනි සරල ආහාරයක් ඔබට සැකසිය හැකියි.

Tharunie