අළු කෙසෙල් සකසන දවසට අළු කෙසෙල් ලෙලි වලින් සැකසිය හැකි මේ අලුත් චිලි පේස්ට් එක ඔබට අත්හදා බලන්න පුළුවන්. ආහාර මිළ අහස උසට ඇති මේ කාලයට මේ චිලි පේස්ට් එක වඩාත් හොඳින් ගැළපේ.

අළු කෙසෙල් ලෙලි ග්‍රෑම් 250ක්

තලාගත් ඉඟුරු, සුදු ලූනු ග්‍රෑම් 50ක්

සිහින්ව ලියා ගත් කරපිංචා ග්‍රෑම්

50ක් පමණ

වියළි කෑලි මිරිස් ග්‍රෑම් 75ක් පමණ

උම්බලකඩ කුඩු ග්‍රෑම් 50ක් පමණ

(අවශ්‍ය නම්)

ලුණු රස අනුව

පොල් තෙල් ස්වල්පයක්

දුඹුරු සීනි ස්වල්පයක්

ලුණු වතුර සමඟ දියකර ගත්

සියඹලා ස්වල්පයක්

සාදා ගන්නා ආකාරය:

පළමුවෙන් අළුකෙසෙල් ලෙලි සෝදා තෙත මාත්තුකර සිහින්ව ලියා ග්‍රයින්ඩ් කරගන්න. මැටි ඇතිළියක් ළිප තබා එයට පොල් තෙල් ස්වල්පයක් දමා රත්වෙන්නට හරින්න. මේ ඇතිළියට ග්‍රයින්ඩ් කරගත් අළුකෙසෙල් ලෙලි දමා රන්වන් පැහැ වන තෙක් බැදගන්න. මෙය මඳ ගින්නේ තබා පිස ගත යුතුයි.

අළුකෙසෙල් ලෙලි රන්වන් පැහැ වන විට කරපිංචා, කෑලි මිරිස් එකතු කරන්න. කැමැති නම් උම්බලකඩ කුඩු ටික ද මෙයට එකතු කරන්න. ටික වේලාවකින් දියකර ගත් සියඹලා යුෂ, දුඹුරු සීනි ස්වල්පයක් එකතුකර හොඳින් කළවම්කර රස අනුව ලුණු ද එකතු කරන්න. මෙය කළු වෙන්නට පෙර රතු පැහැය තිබිය දීම ළිපෙන් බා ගන්න.

මේ චිලි පේස්ට් එක ඔබට කල් තබාගෙන රසවිඳීමට ද හැකියි. ඒ සඳහා හොඳින් පිරිසුදුකර ජීවානුහරණය කළ වීදුරු බෝතලයක සුළං නොවදින සේ අසුරා ගන්න.

(Tharunie)