රුසියාවේ හිටපු ශ්‍රී ලංකා තානාපති උදයංග වීරතුංගට එරෙහිව ලබාගෙන ඇති ජාත්‍යන්තර රතු වරෙන්තුව ඉවත්කර ගැනීමට රජය තීරණය කර තිබේ.
එහි පළමු පියවර ලෙස පසුගිය අඟහරුවාදා (10) අපරාධ පරීක්ෂණ දෙපාර්තමේන්තුවේ නව අධ්‍යක්ෂ, ජ්‍යේෂ්ඨ පොලිස් අධිකාරී ඩබ්ලිව්. තිලකරත්න එම රතු වරෙන්තුව ආපසු කැඳවන ලෙස කොළඹ කොටුව මහේස්ත්‍රාත් අධිකරණයෙන් ඉල්ලීමක් කළේය.
උදයංග වීරතුංග යනු වත්මන් ජනාධිපතිවරයාගේ සහ අගමැතිවරයාගේ සමීපතම ඥාති සහෝදරයකු නිසා පසුගිය යහපාලන රජය ඔහුගෙන් දේශපාලනිකව පළිගැනීම සඳහා මෙම රතු වරෙන්තුව ලබාගෙන ඇති බවට අපරාධ පරීක්ෂණ දෙපාර්තමේන්තුව කොළඹ මහේස්ත්‍රාත් රංග දිසානායක හමුවේ කරුණු දක්වා තිබු නමුත් මහේස්ත්‍රාත්වරයා විසින් එදිනඑම ඉල්ලීම ප්‍රතික්ෂේප කරනු ලැබිය.
කෙසේවෙතත් ඉදිරියේදී මෙම අපරාධ පරීක්ෂණ දෙපාර්තමේන්තුව විසින්ම අධිකරණයට ඉදිරිපත් කිරීමට නියමිත වාර්තා අනුව අවසානයේ එම රතු වරෙන්තුව ආපසු කැඳවීමට අධිකරණයට සිදුවනු ඇති බව නීති ක්ෂේත්‍රයේ ආරංචිමාර්ග සඳහන් කරයි.
පසුගිය ආණ්ඩුව සමයේදී අපරධ පරීක්ෂණ දෙපාර්තමේන්තුව විසින් උදයංග වීරතුංගට එරෙහිව ජාත්‍යන්තර රතු වරෙන්තුවක් ලබාගත්තේ, කුප්‍රකට මිග් යානා ගනුදෙනුව සම්බන්ධයෙන් චෝදනා එල්ල වූ ඔහු අධිකරණය මඟහරිමින් රටින් පළාගොස් සිටීම නිසාය.
(Lanka Leads)