කජු කිලෝව දැන් රු. 7000යි
ලෙලි කජු ආනයනය නතර කිරීමත් සමග කජු මද කිලෝවක මිල රුපියල් හත්දහසක් දක්වා ඉහළ ගොස් ඇත.
සෑම අලුත් අවුරුදු සමයකදීම කජු මද සඳහා තිබෙන ඉල්ලුම ද ඉහළ යන්නේය. දේශීය ලෙලි කජු සඳහා හොඳ වෙළෙඳපොළක් ඇති කිරීමේ අපේක්ෂාවෙන් රජය ලෙලි කජු ආනයනය නතර කර තිබේ.
පසුගිය දිනවල ලෙලි කජු කිලෝවක් රුපියල් 250ත් 350ත් අතර මිලකට අලෙවි කෙරුණු බවත්, අද වන විට ලෙලි කජු කිලෝවක මිල රුපියල් 800 ක් දක්වා ඉහළ ගොස් තිබෙන බවත් කජු සංස්ථාවේ සභාපතිනි නීතිඥ සාරංගා රත්නායක පැවසුවාය.
ලෙලි කජු සඳහා මේ දිනවල පවතින ඉල්ලුම ඉහළ යෑමත් සමග ඒවායෙහි මිල ගණන් මෙලෙස ඉහළ ගොස් ඇතැයි ද ඇය කීවාය. කජු සංස්ථාවේ අලෙවිසල් මගින් පාරිභෝගික ජනතාවට කජු මද කිලෝවක් රුපියල් 3500ත් 5000ත් අතර මිලකට අලෙවි කිරීමට කටයුතු යොදා ඇත.
මාර්තු මාසයේ අග සිට කජු අස්වනු ලැබෙන අතර, මෙවර මෙට්‍රික් ටොන් 12,000ක පමණ කජු අස්වැන්නක් ලැබෙතැයි අපේක්ෂා කරන බව ඇය කීවාය.
කජු අස්වැන්න ලැබුණු පසු මෙම ජුනි, ජූලි මාස වන විටදී කජු වයින් හඳුන්වාදෙන අතර එහි පර්යේෂණ කටයුතු රැසක් මේ වනවිට අවසන් කර ඇතැයි ද සභාපතිවරිය පැවසුවාය.
(Aruna)