රටේ සැබෑම ආයෝජනය දූ දරුවන්ගේ අධ්‍යාපනය සහ චරිත වර්ධනයයි. පරිසරයට ආදරේ කරන පෞරුෂවත් දරුවෙකු බිහි කිරීම රජයේ අරමුණයි
-අග්‍රාමාත්‍ය ආචාර්ය හරිනි අමරසූරිය
රටේ සැබෑම ආයෝජනය දූ දරුවන්ගේ අධ්‍යාපනය සහ චරිත වර්ධනය බවත්, පරිසරයට ආදරේ කරන පෞරුෂවත් දරුවෙකු බිහි කිරීම රජයේ අරමුණ බවත් අග්‍රාමාත්‍ය ආචාර්ය හරිනි අමරසූරිය පැවසුවාය.
දකුණු ආසියාවේ විශාලතම රෝස තිරුවාණා පර්වත පද්ධතිය සහ විශාලතම නා වනය පිහිටි ජාතික නාමල් උයනේ 36 වන සංවත්සර උත්සවය අමතමින් ඊයේ (10) අග්‍රාමාත්‍ය ආචාර්ය හරිනි අමරසූරිය මේ බව කියා සිටියාය.
එහිදී වැඩිදුරටත් අදහස් දැක්වූ අග්‍රාමාත්‍යතුමිය මෙසේද කීය,
ශතවර්ෂ ගණනාවක අභිමානවත් ඉතිහාසයක් තියෙන, අපූර්ව ජෛව විවිධත්වයකින්, සංචාරක ආකර්ෂණයෙන් වගේම ලොකු අධ්‍යාපනික වටිනාකමකින් යුතු අපේ ජාතික නාමල් උයන අනාගත පරම්පරාව වෙනුවෙන් සුරක්ෂිත කරන්න තමන්ගේ මුළු ජීවිතයම කැප කළ පූජ්‍ය වනවාසී රාහුල නායක හාමුදුරුවන්ටත්, උන්වහන්සේගේ ඒ උදාර වෑයමට ශක්තියක් වුණු හැමෝටමත් මම රජයේ ගෞරවය පළමුකොටම පිරිනමනවා.
ලෝකයේ ඕනෑම රටක සැබෑම ආයෝජනය පවතින්නේ හදන ගොඩනැගිලි ඇතුළේ නෙවෙයි. රටක සැබෑම ආයෝජනය තියෙන්නේ අපේ දූ දරුවන්ගේ අධ්‍යාපනය සහ ඔවුන්ගේ චරිත වර්ධනය ඇතුළෙයි.
විභාගවලට විතරක් සීමා වෙච්ච නැති, පරිසරයට ආදරය කරන, පූර්ණ පෞරුෂයකින් හෙබි දරුවෙක් බිහි කිරීම වෙනුවෙන් තමයි අපි නව අධ්‍යාපන ප්‍රතිසංස්කරණ ආරම්භ කරලා තියෙන්නේ.
අපි පරිසර සංරක්ෂණය ගැන වචනයට විතරක් සීමා වුණේ නැහැ. ප්‍රායෝගික තීන්දු තීරණ ගණනාවක්ම අරන් තියෙනවා. වසර 25කට පස්සේ ජාතික පාරිසරික සංශෝධන පනත පාර්ලිමේන්තුවේදී සම්මත කරගන්න අපිට පුළුවන් වුණා. ඒ හරහා සංවර්ධන ව්‍යාපෘතිවල පාරිසරික බලපෑම් ඇගයීම අපි තවත් දැඩි කළා.
අන්තරායකර අපද්‍රව්‍ය පරිසරයට එකතු කරලා අපේ සොබාදහම විනාශ කරන අයට එරෙහිව රුපියල් මිලියන 20 දක්වා දඩ සහ සිරදඬුවම් පනවන නීති අපි ගෙනාවා. ඒ වගේම ආරක්ෂිත තෙත්බිම් විනාශ කරන අයට එරෙහිව රුපියල් මිලියන 1 සිට 10 දක්වා දඩ පැනවීමටත් අපි පියවර ගත්තා.
ඊටත් අමතරව, අපි ක්‍රියාත්මක කරපු භූගත ජලය ආරක්ෂා කිරීමේ විශේෂ වැඩපිළිවෙළ නිසා අද වන විට නාමල් උයන ආශ්‍රිත ජනතාවට නොමිලේ පිරිසිදු පානීය ජලය ලබාගැනීමේ භාග්‍යය උදාවෙලා තියෙනවා.
අපේ අනාගත පරම්පරාව වෙනුවෙන් පරිසරයත්, දූ දරුවන්ගේ අධ්‍යාපනයත් ආරක්ෂා කරගන්න අපි හැමෝම එකතුවෙමු" යැයි අග්‍රාමාත්‍යතුමිය පැවසුවාය.
මෙහිදී අනුශාසනාවක් සිදු කළ ජාතික නාමල් උයනේ නිර්මාතෘ පූජ්‍ය වනවාසී රාහුල හිමියන්,
මේ නාමල් උයන රැකගන්න අපමණ වෙහෙසක් දැරීමට සිදු වූණා. පරිසරය රැක ගැනීම අපි කාගේත් වගකීමක්. මම දේශපාලනය ගැන කථා කරන්නෑ කොහොම වුණත් දැන් රජයේ නිලධාරීන් අපේ දුරකථන ඇමතුම් වලට සවන් දෙනවා මැති ඇමතිවරු අපිට ඇහුම්කන් දෙනවා ඒක ලොකු දෙයක්. අද අපේ අගමැතිතුමිය මෙතනට ආව නිසා මම ඉල්ලීම් දෙකක් ඉදිරිපත් කරන්න කැමතියි එකක් ගල්කිරියාගම ප්‍රාදේශිය රෝහල අපිට හදලා දෙන්න අනිත් එක ආඩියාගල පාසල සංවර්ධනය කරලා දෙන්න කියලා.
පූජ්‍ය වනවාසී රාහුල ස්වාමීන් වහන්සේ ඇතුළු මහා සංඝරත්නය, අමාත්‍ය වසන්ත සමරසිංහ, පාර්ලිමේන්තු මන්ත්‍රී තිළිණ තාරුක, ප්‍රාදේශීය සභා සභාපති G.K. බණ්ඩාර මහතා ඇතුළු පළාත් පාලන නියෝජිතයින්, ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති මහතා, කොරියානු නියෝජිතයින්, රාජ්‍ය නිලධාරීන් සහ ප්‍රදේශවාසීන් විශාල පිරිසක් මෙම අවස්ථාවට එක්ව සිටියහ.