සමානාත්මතාවයෙන් සහ ගුණාත්මකභාවයෙන් පිරි, සියලු දරුවන්ට ප්‍රවේශ විය හැකි අධ්‍යාපන පද්ධතියක් ගොඩනැඟීම යෝජිත අධ්‍යාපන ප්‍රතිසංස්කරණවල අරමුණ බවත් කුමන හෝ ආර්ථික, සමාජීය භූගෝලීය හේතුවක් මත දරුවන් අධ්‍යාපන පද්ධතියෙන් ඉවතට යාම වැළැක්වීමට හැකි සෑම උත්සහයක්ම ගන්නා බවත් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය පැවසුවා ය.
අගමැතිනිය මේ බව ප්‍රකාශ කළේ යෝජිත අධ්‍යාපන ප්‍රතිසංස්කරණ පිළිබඳ ලංකා සභා කොළඹ දියෝකීසියයේ රදගුරු අධ්‍යාපන උපදේශක කමිටුව (BEAC) සමඟ පසුගියදා පැවැති සාකච්ඡාව අමතමිනි.
එහිදී වැඩිදුරටත් අදහස් දැක්වූ අමාත්‍යවරිය,
අඩු ආදායාම්ලාභී දරුවන් බලාපොරොත්තු විරහිත ව අධ්‍යාපන පද්ධතියෙන් ඉවතට යාම වළක්වන්න අපි මේ ප්‍රතිසංස්කරණ තුළින් උත්සහ කරනවා. සෞඛ්‍යමය හේතුන් වගේ විවිධාකාර හේතුන් නිසා අධ්‍යාපනයට ඇති ඉඩ ඇහිරී තිබෙනව නම් ඒ සියලු දරුවන්ට සහභාගි විය හැකි අන්‍තර්කරණ අධ්‍යාපනයක් (Inclusive Education) ලබා දෙන්න කටයුතු කරනවා. සමානාත්මතාව, ගුණාත්මකභාවය සහ සියලු දෙනාට ප්‍රවේශ විය හැකි අධ්‍යාපන පද්ධතියක් ගොඩනැඟීම තුළින් ජාතික අධ්‍යාපන අරමුණු ඉටු කර ගන්න හැකි සෑම උත්සහයක් ම දරනවා.
මෙහිදී රැස් ව සිටි ලංකා සභා කොළඹ දියෝකීසියයේ රදගුරු අධ්‍යාපන උපදේශක කමිටුව (BEAC) විසින් 2026 අධ්‍යාපන ප්‍රතිසංස්කරණ සඳහා සිය යෝජනා හා අදහස් අමාත්‍යවරිය වෙත ඉදිරිපත් කළ අතර එම කමිටුවේ මුලසුන කොළඹ රදගුරු දුෂාන්ත රුද්‍රිගු පියතුමා විසින් දරනු ලැබී ය.
මෙම අවස්ථාව සඳහා අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍යාංශයේ ලේකම් නාලක කලුවැව, ජාතික අධ්‍යාපන ආයතනයේ නියෝජ්‍ය අධ්‍යක්ෂ ජනරාල් ආචාර්ය අශෝක ද සිල්වා ඇතුළු මහත්ම මහත්මීහු සහභාගී වූහ.