චීනයේ බලපෑම්වලට එරෙහිව මෙරට ස්වෛරීත්වය ආරක්ෂා කර ගැනීම එක් කොන්දේසියක් ලෙස දක්වමින් ශ්‍රී ලංකාවට මූල්‍යාධාර සැපයීමේ දී යම් යම් කොන්දේසි ඉදිරිපත් කිරීමට අමෙරිකා එක්සත් ජනපදය තීරණය කර තිබේ.
අමෙරිකානු කොංග්‍රස් මණ්ඩලය වෙත ඉදිරිපත් කර ඇති මූල්‍ය වියදම් පනත් කෙටුම්පතේ විදේශාධාර යටතේ මේ කොන්දේසි සඳහන් කර තිබෙන අතර ඉදිරියේ දී ශ්‍රී ලංකාවට මූල්‍යාධාර ලබාදීමේ දී මෙලෙස කොන්දේසි ඉදිරිපත් කිරීමට පියවර ගෙන ඇත.
ඊට අමතරව ආගමික සහ වාර්ගික සංහිඳියාව ගොඩනැගීමට ද ශ්‍රී ලංකාව කටයුතු කළයුතු බව එහි සඳහන් කර තිබෙන අතර අමෙරිකානු මූල්‍ය වියදම් පනත් කෙටුම්පත එරට සෙනෙට් මණ්ඩලය මඟින් සංශෝධනය කරයි.
එරට කොරෝනා වෛරස් සහන පැකේජයේ කොන්දේසි ද ඊට ඇතුළත් වන අතර එහි දක්වා ඇති අමෙරිකාව විසින් ලබාදෙන විදේශාධාර යටතේ ශ්‍රී ලංකාවට පනවා ඇති කොන්දේසි මානුෂීය සහ ආපදා සහන සඳහා බලපවත්වන්නේ නොමැති බවද එම වාර්තා සදහන් කරයි.
ඒ අනුව අතුරුදන් වූ පුද්ගලයින් හඳුනා ගැනීම, මානව හිමිකම් වර්ධනය, මූල්‍ය විනිවිදභාවය සහ ස්වෛරීත්වය මෙන්ම ජාත්‍යන්තර හමුදා අධ්‍යයන සහ පුහුණු වැඩසටහන් සඳහා අදාළ කොන්දේසි බලනොපැවැත්වේ.
(Dinamina)