සපුගස්කන්ද වැසීමෙන් දැවි තෙල් බලාගාර පහකට බලපෑම්
සපුගස්කන්ද තෙල් පිරිපහදුවේ කටයුතු නතර කිරීමෙන් පසු ලංකා විදුලි බල මණ්ඩලයට අයත් දැවි තෙල් බලාගාර පහකට අවශ්‍ය ඉන්ධන නොමැතිවීමෙන් ඉදිරියේදී ඒවා ක්‍රියාත්මක කර ගැනීමේ ගැටලු මතුවිය හැකි බව විදුලිබල මණ්ඩලයේ ආරංචි මාර්ග සඳහන් කරයි.
එම තත්ත්වය මත මෙගාවොට් හයසීයකට වැඩි විදුලිබල ප්‍රමාණයක් ජාතික පද්ධතියට අහිමි වීමේ අවදානමක් මතුවිය හැකිය. මෙගාවොට් එකසිය පනහකට වැඩි ප්‍රමාණයක් ජාතික පද්ධතියට එක් කළ කැලණිතිස්ස විදුලිබලාගාරය නතර වී ඇත.
එය ක්‍රියාත්මක වූයේ සපුගස්කන්ද තෙල් පිරිපහදුවේ අතුරු නිෂ්පාදනයක් වූ ‘නැජටා’ නමැති ඉන්ධනයෙනි.
විදුලිබල මණ්ඩලයේ විශාලතම දැවි තෙල් බලාගාරය වූ මෙගාවොට් 300ක් නිපදවන කෙරවලපිටිය බලාගාරය, සපුගස්කන්දේ පිහිටි මෙගාවොට් 72 හා 36 වශයෙන් විදුලි බලය නිපදවන බාලගාර දෙක හා කොළඹ වාරායේ බත්තලක පිහිටි මෙගාවොට් 60ක දැවි තෙල් බලාගාරවලට මෙලෙස බලපෑම් එල්ල විය හැකි බව වාර්තා වේ. විදුලිබල මණ්ඩල ආරංචි මාර්ග සඳහන් කරන්නේ එම බලාගාරවලට අවශ්‍ය දැවි තෙල් මාසයකට ආසන්න ප්‍රමාණයක් ගබඩාවල පවතින බවයි.
මේ සම්න්ධයෙන් විදුලිබල මණ්ඩලයේ මාධ්‍ය ප්‍රකාශක ඉංජිනේරු සුලක්ෂණ ජයවර්ධනගෙන් කළ විමසුමේදී ඔහු පැවසුවේ කැලණිතිස්ස විදුලිබලාගාරය මීට දින කිහිපයක සිට නතර කර ඇතත් අනෙක් බලාගාරවලට අවශ්‍ය දැවි තෙල් ජනවාරි මැද වන තෙක් ප්‍රමාණවත් බවයි. මේ දිනවල විදුලි උත්පාදනය සියයට හැටපහක්ම ජල විදුලියෙන් ලබා ගන්නා අතර සියයට විසි හයක් නොරොච්චෝලෙන් ලබාගන්නා බවද හෙතෙම සඳහන් කළේය.
(Aruna)