මොරටුව විශ්වවිද්‍යාලයේ වෛද්‍ය සිසුන්ට සායනික දැනුම ලබාගැනීම සඳහා දර්ගා නගරයේ ප්‍රාදේශීය රෝහලේ සංවර්ධනය හේතු වන බව සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා පැවැසීය.
මේ වන විට විශ්වවිද්‍යාලයේ සිසුන්ට සායනික පුහුණුව සඳහා කායික සහ ශල්‍ය රෝග මහාචාර්ය ඒකක ඇතුළු ඒකක කළුතර ශික්ෂණ රෝහලේ ආරම්භ කිරීමට පියවර ගෙන ඇති බවත් එම සිසුන්ට දර්ගා ප්‍රාදේශීය රෝහල ඇතුළු අවට රෝහල්වල පහසුකම් උපයෝගී කරගෙන සිය අධ්‍යාපනික දැනුම ලබා ගත හැකි බවත් ඇමැතිවරයා ප්‍රකාශ කළේය.
චීන රජයේ ආධාර යටතේ තෝරාගත් රෝහල් 13ක සෞඛ්‍ය පහසුකම් වැඩිදියුණු කිරීමේ ව්‍යාපෘතිය යටතේ රුපියල් බිලියනයක වියදමින් දර්ගා නගරය ප්‍රාදේශීය රෝහලේ ඉදි කළ තෙමහල් නව කායික රෝග වාට්ටු සංකීර්ණය ජනතා අයිතියට පවරමින් ඇමැතිවරයා පසුගියදා (29) මේ බව ප්‍රකාශ කළේය.
මහල් 03කින් සමන්විත මෙම ගොඩනැඟිලි සංකීර්ණය තුළ ඇඳන් 04කින් යුක්ත හදිසි ප්‍රතිකාර ඒකකයක්, ඇඳන් 96කින් සමන්විත ළමා සහ මාතෘ වාට්ටු ද ඇතුළු වාට්ටු 04කින් ද බාහිර රෝගී අංශය ඇතුළු අංශ ගණනාවකින් ද සමන්විත වන අතර මෙම කායික රෝග වාට්ටු සංකීර්ණයට අවශ්‍ය වෛද්‍ය උපකරණ සහ අනෙකුත් උපකරණ සෞඛ්‍ය අමාත්‍යාංශය මඟින් ලබා දීමට ද නියමිතය.
තෙමහල් නව කායික රෝග වාට්ටු සංකීර්ණය විවෘත කිරීමෙන් පසු සෞඛ්‍ය හා ජනමාධ්‍ය අමාත්‍යවරයා අතින් හදිසි ප්‍රතිකාර ඒකකයේ පළමු රෝගියා ලියාපදිංචිය ද සිදු කළ අතර, නව වාට්ටු සංකීර්ණය මෙන්ම මහත් දුෂ්කරතා මධ්‍යයේ රෝගී ප්‍රතිකාර සේවා මෙතෙක් සේවා පවත්වාගෙන ඒමට කටයුතු කළ ස්ථාන සහ අංශයන් ද අමාත්‍යවරයා සිය නිරීක්ෂණයට ද ලක්කෙරිණි.
වසර 70ක පමණ අතීතයකට හිමිකම් කියන දර්ගා නගරයේ ප්‍රාදේශීය රෝහලට චීන මහජන සමූහාණ්ඩුවේ ආධාර යටතේ ලැබුණු පහසුකම් සහිත අත්‍යවශ්‍ය ගොඩනැඟිල්ලක් ලෙස මෙම තෙමහල් නව කායික රෝග වාට්ටු සංකීර්ණය පෙන්වා දිය හැකි බව ඇමැතිවරයා කියා සිටියේය.
දර්ගා නගරයේ ප්‍රාදේශීය රෝහලේ දැනට තිබෙන පහසුකම් භාවිත කරමින් මහජනතාවට උපරිම සේවාවක් ලබාදීමට කටයුතු කරන බවත්, රෝහලට අවශ්‍ය මානව සම්පත ශක්තිමත් කරමින් විශේෂඥ වෛද්‍ය, වෛද්‍ය, හෙද ඇතුළු කාර්ය මණ්ඩල ඉදිරියේ දී ක්‍රමානුකූලව ලබාදීමට පියවර ගන්නා අතර වෛද්‍ය සංකීර්ණය සඳහා අවශ්‍ය වෛද්‍ය උපකරණ සඳහා රුපියල් මිලියන 50ක මුදලක් වෙන් කරන බවත් ඇමැතිවරයා පැවැසීය.
ඉදිරියේ දී සෞඛ්‍ය සේවාවේ සුවිශාල පෙරළියක් සිදු වන බවත්, රටේ ආර්ථීකය ශක්තිමත් වන, ස්ථාවර වන අවස්ථාවේ සියලු සෞඛ්‍ය පහසුකම් ජනතාවට ලබාදීමට කටයුතු කරන බවත් ඇමැතිවරයා පැවසුවේය.
ලෝකයේ ඉහළ පිළිගැනීමක් ශ්‍රී ලංකාවට මේ වන විට හිමිව ඇති බවත්, ලෝකයේ බොහෝ රටවල් ශ්‍රී ලංකා රජය සමඟ සුහදශීලි ගනුදෙනු සඳහා අවතීර්ණ වී ඇති අතර රට පිළිබඳ වූ යහපත් ප්‍රතිරූපය ඉහළ නැඟෙමින් තිබෙන බවත් ඇමැතිවරයා අවධාරණය කළේය.
කළුතර ජාතික සෞඛ්‍ය විද්‍යායතනය (NIHS) මඟින් පාලනය වන දර්ගා නගරය ප්‍රාදේශීය රෝහලේ මෙතෙක් ගොඩනැඟිලි අවශ්‍යතාව දැඩිව පැනනැඟී තිබූ අතර, ඊට පිළියමක් ලෙස වර්ග අඩි 38,400ක වපසරියක පිහිටුවන ලද මෙම නව තෙමහල් ගොඩනැඟිලි සංකීර්ණයත් සමඟ අදාළ අවශ්‍යතාව සම්පූර්ණ වේ. කළුතර සහ බේරුවල රෝහල්වල රෝගී තදබදය අවම කරමින් කළුතර දිස්ත්‍රික්කයේ ප්‍රතිකාර සේවා ශක්තිමත් කිරීමට ද මෙම සංවර්ධන කටයුතු ඉවහල් වේ.
චීන රජයේ ආධාර ව්‍යාපෘතිය යටතේ බේරුවල දර්ගා නගරය ප්‍රාදේශීය රෝහල, අලුත්ගම රෝහල, සමන්තුරෙයි රෝහල, එරාවූර්, පොතුවිල්, කරාපිටිය, පොලොන්නරුව, පදවිය, වලස්මුල්ල, කලවාන, මහියංගණ, රිකිල්ලගස්කඩ යනාදී රෝහල් සංවර්ධනය කිරීමට සෞඛ්‍ය අමාත්‍යාංශය සැලසුම් කර ඇත.
මෙම අවස්ථාවට කළුතර දිස්ත්‍රික් පාර්ලිමේන්තු මන්ත්‍රී චන්දිම හෙට්ටිආරච්චි, ජාතික සෞඛ්‍ය විද්‍යායතනයේ අධ්‍යක්ෂ කේ. නන්දකුමාරන්, නියෝජ්‍ය අධ්‍යක්ෂ විශේෂඥ වෛද්‍ය චරිත් හෙට්ටිආරච්චි, සෞඛ්‍ය හා දේශීය වෛද්‍ය අමාත්‍යාංශයේ අතිරේක ලේකම්වරුන් වන විශේෂඥ වෛද්‍ය කුමාර වික්‍රමසිංහ, සුනිල් ගලගම, ප්‍රභාදීප යෝගචන්ද්‍ර, කළුතර ශික්ෂණ රෝහලේ අධ්‍යක්ෂ වෛද්‍ය මධුභාෂිනී කරුණාරත්න, දර්ගා නගරය ප්‍රාදේශීය රෝහලේ කාර්යභාර වෛද්‍ය නිලධාරි එන්.පී. රණතුංග, මෙරට චීන තානාපති කාර්යාලය නියෝජනය කරමින් චෑන් යාංග් මහත්ම මහත්මීන් ඇතුළු නියෝජිත පිරිසක් සහ විශේෂඥ වෛද්‍ය, වෛද්‍ය, හෙද ඇතුළු සෞඛ්‍ය කාර්ය මණ්ඩල ද එක්ව සිටියහ.