ජනපතිගේ මතවාදය කුමක්දැයි කියා ඕනෑම කෙනෙකු සමඟ ඕනෑම මොහොතක විවාද කිරීමට සූදානම් බව එජාපයේ මිනුවන්ගොඩ ආසන සංවිධායක, පාර්ලිමේන්තු කටයුතු පිළිබඳ ජනාධිපති ජ්‍යෙෂ්ඨ උපදේශක ආශුබෝධ මාරසිංහ මහතා ප්‍රකාශ කළේය.
ඒ මහතා මේ බව පැවසුවේ පෙරේදා (25) සිරිකොත පක්ෂ මූලස්ථානයේ පැවති මාධ්‍ය හමුවකට එක් වෙමිනි. එහිදී වැඩිදුරටත් ඒ මහතා මෙසේද පැවසීය.
මහවැලි ව්‍යාපාරය වගේම බහුකාර්ය ව්‍යාපෘතියක් විදිහට උමා ඔය ව්‍යාපෘතිය හඳුන්වන්න පුළුවන්. කෘෂිකාර්මික කටයුතුවලට වගේම පානීය ජලය සහ ජල විදුලි බලය ලබා ගැනීම කියන කාර්යයන් වෙනුවෙන් උමා ඔය ව්‍යාපෘතිය වෙන් වෙනවා. මේ ව්‍යාපෘතිය මුලින්ම ආරම්භ කිරීම පිළිබඳව කටයුතු සිදු කරන්නේ 1992 වර්ෂයේ ගාමිණී අතුකෝරාල මැතිතුමා මූලික වෙලයි. වන සම්පත් වාරිමාර්ග මහවැලි සංවර්ධන ඇමැතිවරයා විදිහට මේ කැබිනට් පත්‍රිකාව ඔහු විසින් ඉදිරිපත් කරනවා. ශක්‍යතා අධ්‍යයනවලින් පසුව 1993 වර්ෂයේ ඔහුම නැවත කැබිනට් පත්‍රිකාවක් ඉදිරිපත් කරනවා. ඉන්පසු සෑහෙන කාලපරිච්ඡේදයක් මේ සම්බන්ධව අධ්‍යයනය කරනවා. නැවත 2005.01.26 වැනිදා සරත් අමුණුගම ඇමැතිවරයා මුදල් ඇමැති විදිහට වාර්තාවක් ඉදිරිපත් කරනවා. 2005.01.04 වැනිදා කැබිනට් ඇමැතිවරයා ලෙස අනුර කුමාර දිසානායක නැවත මේ සම්බන්ධව කැබිනට් පත්‍රිකාවක් ඉදිරිපත් කරනවා. කෘෂිකර්ම පශු සම්පත් ඉඩම් හා වාරිමාර්ග අමාත්‍යාංශය ඇමැතිවරයා විදිහට තමයි ඔහු ඒ කැබිනට් පත්‍රිකාව ඉදිරිපත් කරන්නේ.
992න් පස්සේ සෑහෙන කාලපරිච්ඡේදයක් මේ පිළිබඳ සාකච්ඡා වෙලා නැවතිලා තිබී නැවත අලුතෙන් කැබිනට් පත්‍රිකාව ඉදිරිපත් කරන්නේ අනුර කුමාර දිසානායක ඇමැතිවරයා වීම විශේෂ වැදගත්කමක් උසුලනවා. 2018 මහින්ද රාජපක්ෂ මුදල් ඇමැතිවරයා විදිහට මේ සම්බන්ධ නිරීක්ෂණ වාර්තාවක් ඉදිරිපත් කරනවා. ඉන්පසු චමල් රාජපක්ෂ මහතා වාරිමාර්ග හා ජල කළමනාකරණ ඇමැතිවරයා විදිහට අවසාන කැබිනට් පත්‍රිකාව ඉදිරිපත් කර මෙහි වැඩ ආරම්භ කර වැඩ අවසන් කරනවා. ඒ අනුව මේ වෙනුවෙන් කැබිනට් පත්‍රිකා ඉදිරිපත් කරපු සියලුම කැබිනට් ඇමැතිවරුන්ට ස්තුතිවන්ත විය යුතුයි. කැබිනට් පත්‍රිකාවක් ඉදිරිපත් කරමින් මේ පිළිබඳව දායක වුණු අනුර කුමාර දිසානායක මහතාටත් අපි ස්තුතිවන්ත විය යුතුයි. නමුත් අනුර කුමාර දිසානායක මහතා මේ උමා ඔය ව්‍යාපෘතිය සම්බන්ධව ඒ කැබිනට් පත්‍රිකාව ඔහු ඉදිරිපත් කිරීම පිළිබඳව කිසිදු ප්‍රකාශයක් හොඳයි හෝ නරකයි කියලවත් මෙතෙක් ප්‍රකාශ කර නැහැ.
අනුර කුමාර දිසානායක මහතා කැබිනට් පත්‍රිකා ඉදිරිපත් කර දැන් පැත්තකට වෙලා ඉද්දි ඒ පක්ෂයේ සමන්ත විද්‍යාරත්න මහතා ව්‍යාපෘතිය විවේචනය කර බැණලා බැණලා අන්තිමේදි ටැප් එකෙන් ස්වාධීනව ඡන්දෙත් ඉල්ලනවා. ඒ සම්බන්ධ වීඩියෝව දැකලා කෙනෙක් දාලා තිබුණා, මේ කට්ටිය පච මරුවෝ කියලා. අනුර කුමාරටම මතක නැහැ උමා ඔයට තමන් කැබිනට් පත්‍රිකාවක් ඉදිරිපත් කළාද කියලා. කණ්ඩලම හෝටලේ නිර්මාණය කරද්දිත් මෙවැනිම විරෝධතා ඉදිරිපත් කළා. නමුත් අවසානයේදී කණ්ඩලම හෝටලය හොඳම පරිසර හිතකාමී හෝටලේ විදිහට තෙවතාවක්ම සම්මාන දිනාගත්තා. ඒ වගේම තමයි මේ රටේ හොඳ ව්‍යාපෘතියක් ගෙනෙද්දි ඒකට විරුද්ධ වෙනවා. රනිල් වික්‍රමසිංහ මහතා අධ්‍යාපන ඇමැතිවරයා වෙලා ඉන්න කාලේ අධ්‍යාපන ධවල පත්‍රිකාව ඉදිරිපත් කළා. අවසානයේ පාසල්වල ශිෂ්‍යයෝ එළියට දාලා පෙළපාළි ගිහින් මේක ඉදිරිපත් කරන්න දුන්නේ නැහැ.
මේ රටට අවශ්‍ය තාක්ෂණය පෙරදැරි කරගත් අධ්‍යාපන ක්‍රමයක් ඒ කාලේ ඉදිරිපත් කරද්දිත් විරුද්ධ වුණා. එදා ධවල පත්‍රිකාවේ තිබුණු හැම දෙයක්ම අද අවශ්‍යයි කියා හැම කෙනෙක්ම කතා කරනවා. ජනතා විමුක්ති පෙරමුණ තමයි හැමදාම එවැනි දේවල්වලට විරුද්ධ වෙලා මේ රට හැරෙව්වේ. ජනතා විමුක්ති පෙරමුණ කරපු කැරලි හේතුවෙන් මේ රට වසර දොළහක් ආපස්සට ගියා. උමා ඔය ව්‍යාපෘතිය වසර දොළහක් දහතුනක් ආපස්සට යන්න හේතුවත් ජනතා විමුක්ති පෙරමුණ තමයි. මේ කරන චෝදනා දිහා බැලුවොත් මහවැලි ව්‍යාපාරය සිද්ධ වෙන මොහොතෙත් මෙවැනි දේවල් කතා වුණා. සත්‍ය කතාව තමයි තෙල්දෙණිය නගරය යට වුණා. අදටත් මහවැලියෙ වතුර හිඳුණු මොහොතක තෙල්දෙණිය නගරයේ නටබුන් අපට දැක ගන්න පුළුවන්. එනිසා එවැනි සිදුවීම් සාමාන්‍ය දෙයක් බවට පත්වෙනවා.
Dinamina