අම්බලන්තොට වී පර්යේෂණායතනය මඟින් මෙවර යල කන්නයේ දී හඳුන්වා දුන් A T 378 නමැති වී ප්රභේදය හෙක්ටයාර් එකකට වී මෙට්‍රික්ටොන් 12 සිට 14ක් දක්වා ඉහළ අස්වැන්නක් වාර්තා කර ඇතැයි එම පර්යේෂණ ආයතනය සඳහන් කරයි.
එම ප්‍රමාණය වී ප්‍රභේදයක් මෙරට වී වගාවේ මෙතෙක් ලබාදුන් ඉහළම අස්වැන්නය. මෙම වී වර්ගය මඟින් අක්කරයකට බුසල් 180ක් වශයෙන් හෙක්ටයාර් එකකට වී බුසල් 450ක අස්වැන්නක් ලබා ගැනීමට හැකි බව අම්බලන්තොට වී පර්යේෂණායතනය පෙන්වා දෙයි. A T 378 වී ප්‍රභේදයේ ගොයම ගංවතුර තත්ත්වයකට වුවද ඔරොත්තු දෙන බවද තහවුරු වී තිබේ.
මෙම වී ප්රභේදය වසර 13ක් තිස්සේ සිදු කරන ලද පර්යේෂණයක ප්‍රතිඵලයක් වන අතර වී බුසලක බර කිලෝග්‍රෑම් 21ක් බව ද, මෙවර යල කන්නයේ දී හම්බන්තොට, අනුරාධපුර, පොලොන්නරුව, මාතර, ගාල්ල හා රත්නපුර දිස්ත්‍රික්කවල වගා කරන ලද අතර ඉහළම අස්වැන්නක් ලැබුණු බවත් අම්බලන්තොට වී පර්යේෂණායතනය සඳහන් කරයි.
විශේෂයෙන් වී වගාවට ඉහළ විභවයක් සහිත දිස්ත්‍රික්කයක් වශයෙන් සැලකෙන හම්බන්තොට දිස්ත්‍රික්කයේ AT 378 වී ප්රභේදය වගාකළ ගොවීන් විශාල පිරිසක් හෙක්ටයාර් එකකට වී මෙට්‍රික්ටොන් 12 සිට 14ක් දක්වා අස්වැන්නක් වාර්තා කළ බව එම වී වගා කළ ගොවීන් කෘෂිකර්ම හා වැවිලි කර්මාන්ත ඇමැති මහින්ද අමරවීර මහතා හමුවී පසුගියදා දැනුම් දී තිබිණි.
සාමාන්‍යයෙන් හම්බන්තොට දිස්ත්‍රික්කයේ වී ගොවීන් රතු කැකුළු වී ප්‍රභේදයන් වැඩිපුරම වගා කිරීමට හුරු වී තිබුණද අපේ රටේ සහල් පරිභෝජනයේ දී වැඩි පිරිසක් ආහාරයට ගනු ලබන්නේ සුදු කැකුළු වී වර්ග බැවින් දකුණු පළාතේ සුදු කැකුළු වී වගාව සඳහා සුදුසු වී ප්‍රභේදයක් වශයෙන් AT 378 වී ප්රභේදය ප්‍රචලිත කරන්නැයි ඇමැති අමරවීර මහතා උපදෙස් ලබා දී ඇත.