සංවර්ධන නිලධාරීන් ඉසුරුපාය අධ්‍යාපන අමාත්‍යාංශය ඉදිරිපිට උද්ඝෝෂණය කිරීමෙන් ඔවුන් ගුරු සේවයට බඳවා ගැනීමට නොහැකි බවත්, මේ සම්බන්ධයෙන් මූලික අයිතිවාසිකම් පෙත්සමක් අධිකරණයේ විභාග වන නිසා අධිකරණය ලබා දෙන තීන්දුව අනුව අධ්‍යාපන අමාත්‍යාංශය ඉදිරි කටයුතු සිදු කිරීමට බලාපොරොත්තු වන බවත්, අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා පැවසීය. අමාත්‍යවරයා මෙම අදහස් පළ කළේ දිවිසවිය වැඩසටහනට එක්වෙමිනි.
එහි දී වැඩිදුරටත් අදහස් දක්වමින් අමාත්‍යවරයා පැවසූයේ, සංවර්ධන නිලධාරීන් ගුරුසේවයට බඳවා ගැනීමට 2023 මාර්තු මස තරඟ විභාගයක් පැවැත්වීමට අධ්‍යාපන අමාත්‍යාංශය කටයුතු සූදානම් කර තිබිය දී සංවර්ධන නිලධාරීන් පිරිසක් විසින් අධිකරණය හමුවේ මූලික අයිතිවාසිකම් පෙත්සමක් ගොනු කළ අතර එහි දී අධිකරණය විසින් පැනවු අතුරු තහනම් නියෝගය හේතු කොට ගෙන පැවැත්වීමට නියමිතව තිබු විභාගය අත්හිටවනු ලැබූ බවයි. මේ වනවිට එම පෙත්සම් විභාග වන බව ද පැවසීය.
තව ද, සංවර්ධන නිලධාරීන්හට අසාධාරණයක් වී ඇති බව පවසමින් ඉසුරුපාය ඉදිරිපිට උද්ඝෝෂණය කරනවාට වඩා විවිධ හේතු මත පදනම්ව අධිකරණය හමුවේ පෙත්සම් ගොනු කර ඇති සංවර්ධන නිලධාරීන් මෙම පෙත්සම් ඉවත් කර ගත්තා නම් එම නඩුව අවසන් බවත්, ඊළඟ සති දෙක තුන තුළ ඉදිරි කටයුතු සිදු කර ගත හැකි බවත් පැවසීය.
නැතහොත් අධිකරණය හමුවේ එම පෙත්සම් විභාග වන බැවින් අධිකරණය විසින් ලබා දෙන තීන්දු ප්‍රකාරව අධ්‍යාපන අමාත්‍යාංශය විසින් ඉදිරි කටයුතු සිදු කිරීමට බලාපොරොත්තු වන බවත් සඳහන් කළේය.