අයවැය විවාදය සදහා දින 12ක් පමණක් ලබා දීමට ආණ්ඩුව කලින් පැවැති පක්ෂ නායක රැස්වීමේදී තීන්දු කර තිබුණද විපක්ෂයේ දැඩි බලපෑම හේතුවෙන් එම දින ගණන 20 දක්වා ඉහළ නැංවීමට ආණ්ඩුව කටයුතු කර ඇත.
අද (11) දින පාර්ලිමේන්තුවේ පැවැති පක්ෂ නායක රැස්වීමේදී මෙම තීරණය ගෙන තිබේ.
මෙම පක්ෂ නායක රැස්වීම සදහා විපක්ෂ නායක සජිත් ප්‍රේමදාස මහතාද එක්ව සිට ඇති අතර ආණ්ඩුව දිගින් දිගටම අවධාරණය කර ඇත්තේ රටේ පවතින තත්ත්වය මත අයවැය විවාදය සදහා දින 12ක් පමණක් ලබා දිය හැකි බවකි.
නමුත් විපක්ෂය අවධාරණය කොට ඇත්තේ කැබිනට් අමාත්‍යංශ 26ක් පවතින බැවින් ඒ එක් එක් අමාත්‍යංශයට දිනක් බැගින් අයවැය විවාදය සදහා දින 26ක් අවශ්‍ය බවකි.
මේ සම්බන්ධයෙන් දෙපාර්ශ්වය අතර පැවැති දීර්ඝ වාදවිවාදවලින් අනතුරුව අයවැය විවාදය සදහා දින 20ක් ලබා දීමට ආණ්ඩුව පියවර ගෙන ඇත.
ඒ අනුව දෙසැම්බර් 10 වැනිදා අයවැය ජන්ද විමසීම පැවැත්වීමටද පක්ෂ නායක රැස්වීමේදී තීන්දු වී තිබේ.
(Lanka Leads)