මාසයකට රුපියල් ලක්ෂයකට වඩා වැඩි ආදායමක් ලබන අයකුගෙන් ආදායම් බදු අය කර ගැනීමේ සීමාව ඊයේ (01) සිට ක්‍රියාත්මක වන පරිදි මාසයකට රුපියල් එක්ලක්ෂ පනස් දහස දක්වා වැඩිකොට ඇත.
බදු නිදහස් සීමාව මෙසේ ඉහළ දැමීමෙන් අඩු ආදායම්ලාභීන් ඇතුළු බොහෝ පිරිසකට මේ තුළින් බදු සහන හිමි වන බව දේශීය ආදායම් දෙපාර්තමේන්තුව සඳහන් කරයි. ආදායම් බදු අය කර ගැනීමේ සීමාව රුපියල් පනස් දහසකින් වැඩි කිරීමට ජනාධිපති අනුර කුමාර දිසානායක මහතා මුදල් ඇමැතිවරයා ලෙස මේ වසරේ පෙබරවාරි 17 වැනිදා නව ආණ්ඩුවේ මංගල අය-වැය ඉදිරිපත් කරමින් කළ යෝජනාව ඒ අනුව ඊයේ (01) සිට ක්‍රියාත්මකය.
ශ්‍රී ලංකාවේ 79 වැනි අය-වැය ලෙස වසර 2025ට අදාළව ජනාධිපතිවරයා විසින් පාර්ලිමේන්තුවට ඉදිරිපත් කළ අය-වැය යෝජනාවලට අනුව බදු සංශෝධනය ක්‍රියාත්මකය. රුපියල් 100,000ක මාසික ආදායමක් ලබන පුද්ගලයකු සඳහා පනවා තිබූ ආදායම් බද්ද ඊයේ (01) සිට රු. 150,000 දක්වා ඉහළ දමා තිබේ. ඒ අනුව වසරකට මෙතෙක් රුපියල් ලක්ෂ 12ක ආදායම් ලැබූ අයගෙන් බදු අය කළ ද මෙම බදු සහනය හේතුකොටගෙන බදු ගෙවිය යුතු වාර්ෂික ආදායම රුපියල් ලක්ෂ 18 දක්වා ඉහළ ගොස් ඇත.
දේශීය ආදායම් පනතේ සංශෝධනවලට අනුව විදෙස් රටවල් සඳහා සපයනු ලබන සේවාවලින් ලැබෙන ඉපැයීම සඳහා වන සියයට 15ක බදු අය කර ගැනීම ද ඊයේ (01) සිට ක්‍රියාත්මක වේ.