රට තුළ පැවති අයහපත් කාලගුණික තත්ත්වය හේතුවෙන් 2025 නොවැම්බර් මස 20 වන දින සිට 2025 නොවැම්බර් මස 29 වන දින පස්වරු 3.00 දක්වා කාලය තුළ, බදුල්ල,කොළඹ,ගාල්ල, හම්බන්තොට, මහනුවර, කෑගල්ල, කුරුණෑගල, මාතර, මාතලේ, නුවර එළිය,රත්නපුර හා ගම්පහ යන දිස්ත්‍රික්කවල නායයෑම් (බෑවුම් අස්ථාවරතා ඇතුළුව), කණ්ඩි කඩාවැටීම්, ගල් පෙරලීම් හා වෙනත් සිදුවීම් ඇතුළුව සමස්ත සිදුවීම් 203ක් වාර්තා වී තිබේ.
ඉන් වැඩිම සිදුවීම් ප්‍රමාණයක් වාර්තා වී ඇත්තේ රත්නපුර දිස්ත්‍රික්කයෙන් වන අතර එය සිදුවීම් 61ක් ලෙස හඳුනා ගෙන ඇත.
මේ වන විට වාර්තා වී ඇති පරිදි, අවාසනාවන්ත ලෙස මෙම සිදුවීම්වලින් සමස්ත පුද්ගල මරණ 94ක් වාර්තා වී තිබේ. ඉන් වැඩිම මරණ ප්‍රමාණයක් වන මරණ 37ක් මහනුවර දිස්ත්‍රික්කයෙන් වාර්තා වන අතර, කෑගල්ල දිස්ත්‍රික්කයෙන් මරණ 28 ක්, බදුල්ල දිස්ත්‍රික්කයෙන් මරණ 19ක්, කුරුණෑගල දිස්ත්‍රික්කයෙන් මරණ 5ක් සහ මාතලේ දිස්ත්‍රික්කයෙන් මරණ 5ක් ලෙස අනෙකුත් මරණ සංඛ්‍යා වාර්තා වේ.
ඔබ ජීවත් වන්නේ ආපදා සහිත කඳුකර ප්‍රදේශයක නම් නායයෑම්, බෑවුම් අස්ථාවර වීම්, ගල් පෙරළීම්, කණ්ඩි කඩා වැටීම් සහ පොළව ගිලා බැසීම් පිළිබඳව නිරන්තර සැලකිල්ලෙන් පසුවන ලෙසත් ජාතික ගොඩනැඟිලි පර්යේෂණ සංවිධානය මඟින් නිකුත් කරන නායයෑම් පූර්ව අනතුරු ඇඟවීමේ පණිවිඩ වෙත අවධානය යොමු කරන ලෙසත් අවශ්‍ය නම් ආරක්ෂිත ස්ථාන කරා ඉවත් වන ලෙසත් ජාතික ගොඩනැගිලි පර්යේෂණ සංවිධානය මහජනතාවගෙන් ඉල්ලා සිටියි.
තද වැසි සමග සිදුවිය හැකි නායයෑම් හා කණ්ඩි කඩා වැටීම් වලින් ජීවිත බේරා ගනිමු...
හදිසි ඇමතුම් - 117(ආපදා කළමනාකරණ මධ්‍යස්ථානය)