පරිසර අමාත්‍යවරයා සහ නියෝජ්‍ය අමාත්‍යවරයාගේ මූලිකත්වයෙන් පත්කළ ජාතික වනෝද්‍යාන කළමනාකරණ කමිටුව ඊයේ (30) සහ අද (31) දෙදින යාල ජාතික වනෝද්‍යායේ පවතින මූලික ගැටලු විමසා බැලීමටත් , නිරීක්ෂණය කිරීමටත් සහභාගී විය.
යාල වනෝද්‍යානයේ සියලුම කලාප ආවරණය කරමින්, උපරිම වාහන ධාරිතාව, වාසස්ථාන සංවර්ධනය, විදුලි වැටවල් ප්‍රතිසංස්කරණය, කාර්ය මණ්ඩල අවශ්‍යතා, සහ ප්‍රවේශපත්‍ර කවුළු අවශ්‍යතා සම්බන්ධයෙන් කමිටුවේ නිර්දේශ ලබා දීම මෙහි දී සිදු විය. මෙම නිර්දේශ ලබා ගැනීම සඳහා අවශ්‍ය අදහස්, සෆාරි ජීප් රථ ක්‍රියාකරුවන්, වනෝද්‍යාන භාරකරුවන් සහ ප්‍රදේශවාසීන් ඇතුළු විවිධ පාර්ශ්වයන්ගෙන් රැස්කර ගන්නා ලදී.
එහිදී ජෛව විවිධත්වය සංරක්ෂණය මූලික කරගනිමින් වනෝද්‍යාන නැරඹීමට පැමිණෙන දෙස් විදෙස් සංචාරකයන්ගේ තදබදය අවම කර පහසු නැරඹීමක් ලබා දීම සඳහා Online හරහා ප්‍රවේශ පත්‍ර වෙන් කරවා ගැනීම මෙන් ම සංචාරකයන්ගේ ප්‍රමාණාත්මක ධාරිතාව පිළිබඳ සලකා බලා ආසන්නතම උද්‍යානවලට යොමු කරවීම සම්බන්ධයෙන් අවධානය යොමු විය.
එමෙන් ම උද්‍යාන තුළ පවතින ජල පෝෂක ප්‍රදේශ ලෙස හඳුන්ගන්නා වනජීවීන්ට ආහාර ජලය සපයන වැව් අමුණු ප්‍රදේශ වැඩිදියුණු කිරීම සඳහා ද කමිටුව විසින් අවධානය යොමු කරන ලදී. මෙම කමිටුවෙන් ලබා දෙන නිර්දේශ අනුව කඩිනම් පිළියම් ක්‍රියාත්මක කිරීම පරිසර අමාත්‍යංශයේ අධීක්ෂණය යටතේ වනජීවී දෙපාර්තමේන්තුව විසින් සිදු කරනු ලබයි.
ඉදිරියේ දී මෙම ජාතික වනෝද්‍යානවල සංරක්ෂණ ක්‍රියාවලිය හා දරාගැනීමේ හැකියාව විධිමත් ලෙස පවත්වා ගැනීම සහ එහි යාන්ත්‍රණය විධිමත්ව පවත්වාගෙන යාම සම්බන්ධයෙන් මෙම විද්වත් කමිටුවේ නිරීක්ෂණ සහ නිර්දේශ ලබා දීමට අපේක්ෂා කෙරේ.
මෙම අවස්ථාවට විද්වත් කමිටුවේ සභාපති ජ්‍යෙෂ්ඨ පරිසර විශේෂඥ ගාමිණී සුබසිංහ, කමිටු සාමාජික බස්නාහිර පළාත් සංචාරක මණ්ඩලයේ සභාපති ආචාර්ය මහේෂ් ප්‍රියදර්ශන සහ ජ්‍යෙෂ්ඨ පරිසර උපදේශක ආචාර්ය විද්‍යාරත්න හේරත් යන මහත්වරුන් සහභාගී වූහ. යාල වනෝද්‍යානය නියෝජනය කරමින් කලාප භාර සහකාර අධ්‍යක්ෂ සහ යාල වනෝද්‍යානයේ පාලක ද මෙම නිරීක්ෂණය සඳහා පැමිණියහ.