පූජ්‍ය ඕමල්පේ සෝභිත හිමියන් විසින් ඊයේ (30) විශේෂ ලිපියක් විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා වෙත පිරිනමනු ලැබීය.
ඒ තායිලන්තය සහ කාම්බෝජය අතර සාමය සහ සංහිඳියාව සඳහා ශ්රී ලංකාවාසී මහානායක හිමිවරුන් සිව්නමකගේ ඒකාබද්ධ ඉල්ලීමක් ඉදිරිපත් කරමිනි.
මෙම ඒකාබද්ධ ඉල්ලීම මල්වතු, අස්ගිරි, රාමඤ්ඤ සහ අමරපුර මහානායක හිමිවරුන්ගේ අත්සනින් ඉදිරිපත් කර ඇති අතර දෙරට අතර ඇති වී තිබෙන ගැටුම පිළිබඳව දැඩි කනස්සල්ල ද පළ කර තිබේ.
පැරණි විහාරස්ථානයක හිමිකාරිත්වය පිළිබඳ ආරවුලක් ඇති වුවද, බල ගැටුම් සඳහා ආගමික හැඟීම් උපයෝගී කර ගැනීම බුදුරජානන් වහන්සේගේ ඉගැන්වීම්වලට පටහැනි බව ද ලිපියේ අවධාරණය කෙරේ. මහානායක හිමිවරු රජයන් දෙකෙන් මෙන්ම තායිලන්තය හා කාම්බෝජයේ ආගමික නායකයින්ගෙන් සහ බෞද්ධයන්ගෙන් ඉල්ලා සිටින්නේ මතභේදය සාමකාමීව විසඳා ගැනීමෙන් සහ සහජීවනය වර්ධනය කිරීමෙන් බුදු දහමේ උතුම් බව ආරක්ෂා කරන ලෙසයි.
“බුදුන් වහන්සේගේ අනුගාමිකයින් වශයෙන්, සාමය සහ අවිහිංසාව පිළිබඳ උන්වහන්සේගේ ඉගැන්වීම් ප්‍රායෝගිකව පවත්වාගෙන යාම සහතික කිරීම අපගේ යුතුකමයි,” යනුවෙන් අමාත්‍ය විජිත හේරත් මගින් යොමු කරන ලිපියේ සඳහන් වන අතර, ප්‍රචණ්ඩත්වය වැළැක්වීම සහ සහජීවනය පෝෂණය කිරීම සඳහා භික්ෂූන් වහන්සේලා ඉටු කළ වැදගත් කාර්යභාරයේ ඉතිහාසය ද සිහිපත් කරයි.