ශ්‍රී ලංකා පොදුජන පෙරමුණේ නව නායකත්වය සඳහා එම පක්ෂයේ හිටපු නායක සහ හිටපු ජනාධිපති මහින්ද රාජපක්ෂ මහතා නැවත වරක් තෝරා පත් කරගැනිණි.
කොළඹ සුගතදාස ගෘහස්ථ ක්‍රීඩා සංකීර්ණයේදී පසුගියදා (15) පස්වරුවේ පැවති ශ්‍රී ලංකා පොදුජන පෙරමුණේ දෙවැනි ජාතික මහා සම්මේලනයේදී ඒ මහතා නව නායකත්වය සඳහා එලෙස තෝරා පත් කරගත් අතර, ඒ මහතාගේ නම පාර්ලිමේන්තු මන්ත්‍රී ගාමිණී ලොකුගේ මහතා විසින් යෝජනා කෙරිණි.
පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා විසින් එය ස්ථිර කරන ලද අතර, රැස්ව සිටි සියලු දෙනා අත් ඔසවා ඊට අනුමැතිය දුන්හ.
ඊට අමතරව පක්ෂයේ විධායක සභාව සඳහාද මන්ත්‍රීවරුන්, ආසන සංවිධායකයන්, තරුණ පෙරමුණ, පළාත් පාලන සංසදය, වෘත්තීය සමිති සම්මේලනය, සමස්ත ලංකා කාරක සභාව, අනුබද්ධ සංවිධාන නියෝජනය වන පරිදි නියෝජිතයෝ තෝරා පත් කරගනු ලැබූහ. ‘ආයුබෝවන් – 2024’ කොළඹ, සුගතදාස ගෘහස්ථ ක්‍රීඩා සංකීර්ණයේදී පසුගියදා පස්වරුවේ පැවති ශ්‍රී ලංකා පොදුජන පෙරමුණේ දෙවැනි ජාතික මහා සම්මේලනය හිටපු ජනාධිපති මහින්ද රාජපක්ෂ මහතාගේ පැමිණීමත් සමඟ ආරම්භ වූ අතර ශ්‍රී ලාංකේය දේශපාලන වංශ කතාවට නව පරිච්ඡේදයක් එක්කළ ශ්‍රී ලංකා පොදුජන පෙරමුණේ දෙවැනි ජාතික මහා සම්මේලනය උත්කර්ෂවත් අයුරින් පැවැත්විණි.