අද රටේ පවතින ප්‍රධානම ප්‍රශ්නය ඩොලර් ප්‍රශ්නය බවත්, ඩොලර් ලබා ගැනීමට හැකි වුවහොත් රට ගොඩනැඟීම අපහසු කාර්යයක් නොවන බවත්, ඒ සඳහා අපි බලයට පත්වූ විට රට ඩිජිටල් අපනයන කේන්ද්‍රීය විප්ලවයකට යොමු කරන බවත් පැවසූ සමගි ජන බලවේගයේ නායක හා විපක්ෂ නායක සජිත් ප්‍රේමදාස මහතා, ඒ තුළින් බියගම නිදහස් වෙළෙඳ කලාපයත් ඩොලර් උපදවන මධ්‍යස්ථානයක් බවට පත්කරන බවද පැවසීය.
විපක්ෂ නායකවරයා ඒ බව පැවසුවේ පසුගියදා බියගම, පේරගස්හන්දිය ‘ලව්ලි ‘ ක්‍රීඩාංගණයේ පැවති සමගි ජන බලවේගයේ බියගම ආසන බලමණ්ඩල රැස්වීම අමතමිනි. එහිදී වැඩිදුරටත් අදහස් දැක්වූ විපක්ෂ නායකවරයා මෙසේද පවසා සිටියේය.
“මේ වන විට මේ රටේ සෑම කෙනෙක්ම අසීමිත පීඩනයකින් ඉන්නේ. අපි ඕනෑම අවස්ථාවක ජනතාව වෙනුවෙන් රටේ වගකීම භාර ගන්නට සූදානම්. අපි ඒ වගකීම භාර ගන්නේ ජනවරමකින් බලය ලබා ගැනීමකින් පමණයි. රට බංකොලොත් වීම මත මේ රටේ ලක්ෂ 220ක් වූ ජනතාව අගතියට පත් වෙලා. අපි බලයට පත්වූ වහාම ඔවුන්ට වන්දි ලබා ගැනීමේ ක්‍රමවේදයක් ස්ථාපිත කරනවා. ඒ විතරක් නෙමෙයි රට බංකොලොත් කළ පුද්ගලයන් නීතිය හමුවට පමුණුවා ඔවුන්ට උපරිම දඬුවම් ලබා දෙනවා.
අපි බංකොලොත් වූ මේ රට ගොඩනඟන්න කටයුතු කරනවා. නමුත් දැන් අපට තිබෙන ප්‍රධානම ප්‍රශ්නය ඩොලර් ප්‍රශ්නයයි. ඩොලර් ලබා ගැනීමට හැකි වුවහොත් රට ගොඩනැඟීම අපහසු කාර්යයක් වන්නේ නැහැ. ඒ සඳහා අපි මේ රට ඩිජිටල් අපනයන කේන්ද්‍රීය විප්ලවයකට යොමු කරන්නට ඕනෑ. එවැනි ඩිජිටල් විප්ලවයක් කිරීමට අවශ්‍ය වන සැලසුම් අපි ළඟ තිබෙනවා. ඩිජිටල් විප්ලවය තුළින් බියගම නිදහස් වෙළෙඳ කලාපයද ඩොලර් උපදවන මධ්‍යස්ථානයක් බවට පත්කරනවා.
සමගි ජන බලවේගය විපක්ෂයේ සිටිමින් රටට අලුත් ආදර්ශයක් ලබා දී තිබෙනවා. ඒ තමයි අපි විපක්ෂයේ සිටිමින් ජනතාවගේ සුබසිද්ධිය උදෙසා සේවය කිරීම. ඒ අනුව, මේ වන විට අපි දිවයිනේ පාසල් 54කට සුහුරු පන්ති කාමර ලබා දී තිබෙනවා. පාසල් 80කට බස්රථ ලබා දී තිබෙනවා. රජයේ රෝහල් 56කට මිනිස් ජීවිත බේරාගැනීම සඳහා වෛද්‍ය උපකරණ හා ඖෂධ ලබා දී තිබෙනවා.
නමුත් මේ රටේ මෙතක් බලයට පත්වූ සෑම නායකයෙක්ම ජනතාවට සේවාවක් කළේ ආණ්ඩු බලයේ සිටියදීයි. ඔවුන් විපක්ෂයේ සිටි කාලයේ ජනතාවට සේවාවක් කර නැහැ. අපට ලැබෙන අරමුදල් සියල්ලක්ම යොදවා තිබෙන්නේ මේ රටේ අධ්‍යාපනය හා සෞඛ්‍ය පද්ධතිය දියුණු කරන්නයි. අපි විපක්ෂයේ සිටිමින් ඉටුකරන ජනතා මෙහෙවර ගැන වටහාගෙන තිබෙන ජනතාව, අපි බලයට පත්වූ විට රටට සේවාවක් කරයි යන විශ්වාසයක් ඇති කරගෙන තිබෙනවා.”