ශ්‍රී ලංකා - ඉතාලි පාර්ලිමේන්තු මිත්‍රත්ව සංගමයේ සභාපතිවරයා ලෙස පාර්ලිමේන්තු මන්ත්‍රී උදයන කිරිඳිගොඩ මහතා පසුගියදා (11) පත් කෙරිණි.
ශ්‍රී ලංකා - ඉතාලි පාර්ලිමේන්තු මිත්‍රත්ව සංගමයේ නවවැනි පාර්ලිමේන්තුවට අදාළ නිලධාරී මඩුල්ල තෝරා පත්කර ගැනීමේ රැස්වීම කථානායක ගරු මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තුවේදී පැවැත්විණි. මෙම රැස්වීමට ශ්‍රී ලංකාවේ ඉතාලි තානාපති ඩේමියානෝ ෆ්‍රැන්කොවිග් මහතා ප්‍රධාන ආරාධිත අමුත්තා ලෙස සහභාගී වූ අතර, අමාත්‍යවරුන්, රාජ්‍ය අමාත්‍යවරුන් පාර්ලිමේන්තු මන්ත්‍රීවරයන් සහ පාර්ලිමේන්තුවේ මහලේකම් කුෂානි රෝහණදීර මහත්මිය ඇතුළු පිරිසක් එක් වූහ.
මෙහි දී රාජ්‍ය අමාත්‍ය අරවින්ද් කුමාර්, පාර්ලිමේන්තු මන්ත්‍රීවරුන් වන ගරු වේලු කුමාර් සහ ගරු බී.වයි.ජී. රත්නසේකර යන මහත්වරුන් මිත්‍රත්ව සංගමයේ උප සභාපතිවරුන් ලෙස පත් විය. ගරු හෙක්ටර් අප්පුහාමි මහතා ලේකම් ලෙස පත් කරන ලද අතර, ගරු මොහොමඩ් මුසම්මිල් මහතා සහකාර ලේකම් ලෙසත් ගරු කරුණාදාස කොඩිතුවක්කු මහතා භාණ්ඩාගාරික ලෙසත් පත් කෙරිණි.
ශ්‍රී ලංකා - ඉතාලි පාර්ලිමේන්තු මිත්‍රත්ව සංගමය පිහිටුවීම මගින් ශ්‍රී ලංකාව සහ ඉතාලිය අතර පවතින දිගුකාලීන සබඳතාවය තවදුරටත් වර්ධනය කිරීමට හේතු වන බව මෙහි දී අදහස් දැක්වූ කථානායක ගරු මහින්ද යාපා අබේවර්ධන මහතා ප්‍රකාශ කළේය.
එසේම, GSP+ පහසුකම නැවත ස්ථාපනය කරගැනීම සම්බන්ධයෙන් 2017 දී ශ්‍රී ලංකාවට ලබාදුන් සහයෝගය සහ ශ්‍රී ලංකාවට පනවා තිබූ මත්ස්‍ය අපනයන තහනම ඉවත්කිරීම සම්බන්ධව ඉතාලිය ලබාදුන් සහයෝගයන් පිළිබඳව ද කථානායකවරයා සිය ස්තූතිය පළ කළේය.
මෙහි දී අදහස් දැක්වූ ශ්‍රී ලංකාවේ ඉතාලි තානාපති ඩේමියානෝ ෆ්‍රැන්කොවිග් මහතා, ශ්‍රී ලංකාව සහ ඉතාලිය අතර දැනට පවතින වෙළඳ හා ආයෝජන සබඳතා තව දුරටත් වර්ධනය කර ගනිමින් ශ්‍රී ලංකාවේ නව ආයෝජනයන් කිරීම සඳහා නව ආයෝජකයන් ඉතාලියෙන් සම්බන්ධ කරගැනීමට තමා බලාපොරොත්තු වන බව සඳහන් කෙළේය.
මෙහි දී අදහස් දැක්වූ ශ්‍රී ලංකා - ඉතාලි පාර්ලිමේන්තු මිත්‍රත්ව සංගමයේ අභිනව සභාපති, පාර්ලිමේන්තු මන්ත්‍රී උදයන කිරිඳිගොඩ මහතා, සංගමයේ සභාපතිවරයා ලෙස තමන්ව තෝරා පත් කර ගැනීම පිළිබඳව සිය කෘතඥතාව පළ කළේය.
තව ද ඉතාලිය සහ ශ්‍රී ලංකාව අතර ද්වී පාර්ශවික සබඳතා තවදුරටත් වර්ධනය කිරීම සඳහා කටයුතු කිරීමට අපේක්ෂා කරන බව ද ප්‍රකාශ කළේය.