එකතු කළ අගය මත බදු (සංශෝධන) පනත් කෙටුම්පත සහ මුදල් පනත් කෙටුම්පත දෙවැනිවර කියවීම අද දිනයේම සිදුකිරීමට සභානායක ආචාර්ය සුසිල් ප්‍රේමජයන්ත මහතා සිදුකළ යෝජනාව වැඩි ජන්දයෙන් පාර්ලිමේන්තුවේදී සම්මත විය.
2024 විසර්ජන පනත් කෙටුම්පතේ අද දිනට නියමිත කාරක සභා අවස්ථාවේ වැඩකටයුතු නිමවීමෙන් අනතුරුව පාර්ලිමේන්තුවේ න්‍යාය පත්‍රයේ සදහන් එකතු කළ අගය මත බදු (සංශෝධන) පනත් කෙටුම්පත සහ මුදල් පනත් කෙටුම්පත පිළිබඳ දෙවැනිවර කියවීම අද දිනම (11) සම්මත කර ගැනී‍මට මෙහිදී සභානායකවරයා විසින් යෝජනා කර සිටියේය. තවද ඉන් අනතරුව පරිපූරක ඇස්තමේන්තුව ද අද දිනම අනුමත කරගත යුතු බවද සභානායකවරයා යෝජනා කර සිටියේය.
ඒ අනුව විපක්ෂය විසින් එම යෝජනාව සඳහා ජන්දයක් අවශ්‍ය බව පැවසීය. ඒ අනුව අද පෙරවරු 10.00 ට පමණ පැවති ඡන්ද විමසීමේදී ඊට පක්ෂව ඡන්ද 92ක් ලැබුණු අතර විපක්ෂව ඡන්ද 41ක් හිමි විය.
එක් මන්ත්‍රීවරයෙක් ජන්දය භාවිත කිරීමෙන් වැළකී සිටි අතර ඒ අනුව වැඩි ඡන්ද 51 කින් ආණ්ඩු පක්ෂය ගෙනා යෝජනාව සම්මත විය.