Saturday, July 13, 2024
Follow Us
එකතුව වැඩ කළොත් ලංගමය ලාභ ලබන ආයතනයක් කරන්න පුළුවන් - ප්‍රවාහන ඇමැති

පසුගිය කාලය තුළ සොයා බැලුවා මෙම ආයතනය ලාභ ලබන තත්ත්වයට පත් කළ හැකි ද කියා සියලු දෙනා එකතුවෙලා වැඩ කළොත් ශ්‍රී ලංකා ගමනාගමන මණ්ඩලය වසරක් ඇතුලත ලාභ ලබන තත්ත්වයට පත් කළ හැකි බව ප්‍රවාහන, මහාමාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන මහතා පසුගියදා ශ්‍රී ලංකා ගමනාගමන මණ්ඩලයේ වෘත්තීය සමිති නියෝජිතයින් හමු වූ අවස්ථාවේදී ප්‍රකාශ කළේය.

මෙම හමුව පසුගියදා මහාමාර්ග අමාත්‍යාංශයේ දී පැවැත්විණි.වැඩිදුරටත් අදහස් දැක්වූ අමාත්‍ය ආචාර්ය බන්දුල ගුණවර්ධන මහතා

"දේශපාලඥයෙක් නොවන අමාත්‍යාංශයක හිටපු ලේකම්වරයෙක්, ඉංජිනේරුවෙක් මම සභාපති ලෙස පත් කළා. ඔහු පත්වන විට පඩි ගෙවන්න බැරි ඩිපෝ 37ක් තිබුණා. දැන් පඩි ගෙවන්න බැරි ඩිපෝ සංඛ්‍යාව 9 දක්වා අඩුවෙලා තියෙනවා.ගමනාගමන මණ්ඩලයේ තියෙන ප්‍රධාන ගැටලුව තමයි දෛනිකව මගීන්ගෙන් ලැබෙන මුළු ආදායමම ආයතනයට නොලැබීම. රියැදුරු මහත්තුරුයි කොන්දොස්තර මහත්තුරුයි ආදායමින් කොටසක් සීටීබී එකට බැඳ ඉතිරි කොටස ගෙදර ගෙනියනවා. සංවිධානාත්මක මෙම මුදල් එකතු කිරීම සිදු කරගෙන යනවා. ගමනාගමන මණ්ඩලයට ලැබිය යුතු පියල් ලක්ෂ 100 ක පමණ ආදායමක් දවසකට මේ නිසා අහිමි වෙනවා. එයට විසඳුමක් ලෙස ඊ - ටිකටින් ක්‍රමය හඳුන්වාදීමට කටයුතු කරගෙන යනවා. ඉලෙක්ට්‍රොනික් ටිකට් ක්‍රමය ආපුවාම ගමනාගමන මණ්ඩලයේ සෑම ඩිපෝවක්ම ලාභ ලබන තත්ත්වයට පත්වෙනවා. අලුතින් කැඳවන ලද ටයර් ටෙන්ඩරය නිසා ටයර් එකකින් රුපියල් 9000ක ඉතිරියක් ආයතනයට ලැබෙනවා. එමගින් මාස හතරක් ඇතුළත රුපියල් මිලියන 85ක් ඉතිරි කරගන්න අපිට හැකිවුනා.
අපි හිතන විදියට අවුරුද්දකට රුපියල් මිලියන 7000ක් පමණ ලාභයක් ගමනාගමන මණ්ඩලයට ඉපයිය හැකියි. එයින් කොටසක් සේවකයින්ටද බෙදා දිය හැකි අතර සියලු දෙනා සඳහා හොඳ රක්ෂණ ක්‍රමයක් ද හඳුන්වා දිය හැකියි. ගමනා ගමන මණ්ඩලය තුළ ඉතා අසීරුවෙන් රාජකාරි කරන හොඳ සේවක පිරිසක් ඉන්නවා.

පසුගිය කාලයේ 8% කින් ආදායම වැඩි වැඩිවෙලා තිබෙනවා. ඒ වාගේම වියදම දඩු වෙලා තියෙනවා. බස්රථ අටසියයක් පමණ අලුත් සභාපතිතුමා පත්වෙනකොට ධාවනයෙන් ඉවත් කරලා තිබුණා. ඉන් හාරසියක් හදන්න සල්ලි දුන්නා. මේ වන විට බස්රථ 175ක් පමණ හදලා ඉවරයි ඉතිරිටිකත් ඔක්තෝබර් 31 වැනිදා වන විට සාදා අවසන් කිරීමට කටයුතු කරනවා. ඉන්දීය ණය ආධාර යටතේ බස්රථ පන්සියයක් අලුතෙන් ගත්තා. ලාභ ලබන ඩිපෝ සඳහා දුර ගමන් සඳහා බස්රථ දාහක් අලුතින් ගන්න කටයුතු කර ගෙන යනවා.
2030 වන විට පොදු ප්‍රවාහනය පොසිල ඉන්ධන වලින් බැහැරව ඉලෙක්ට්‍රික් වෙන්න ඕන කියලා ලෝකයේ රටවල් එකඟවෙලා තියෙනවා. ගමනාගමන මණ්ඩලය සතු බස්රථ 6000 අනාගතයේ දවසක ඉලෙක්ට්‍රික් බස්රථ වෙන්න ඕන එහෙම නැතිව පවතින්න බැහැ.
බස්නාහිර පළාතේ මගී ප්‍රවාහනය සඳහා ඉලෙක්ට්‍රික් බස් රථ 200ක් ගෙන ඒමට අපි ආයෝජකයින්ට අවස්ථාව දීලා තියෙනවා යැයි ද අමාත්‍යවරයා වැඩිදුරටත් මෙහිදී පැවසීය.
මෙම අවස්ථාවට ශ්‍රී ලංකා ගමනාගමන මණ්ඩලයේ සභාපති එස්. එම්. ඩී. එල්. කේ. අල්විස් මහතා ඇතුළු වෘත්තීය සමිති නියෝජිතයින් එක්ව සිටියහ.