රටේ මහජනතාවගේ ඉඩම් හා දේපල දේශපාලන හිතවතුන්ට අත්තනෝමතිකව පැවරීමට හෝ ඒවා බහුජාතික සමාගම් වලට සින්නක්කරව ලබාදීම සම්පූර්ණයෙන් නතර කරන බව ජාතික ජන බලවේගයේ ජනාධිපතිධූර අපේක්ෂක අනුර කුමාර මහතා ජාතික සමගිය ප්‍රතිපත්තිය එළි දක්වමින් සහතික කර සිටියේය.
එමෙන්ම රටේ ජාතික සමගියට බාධාවක් වූ භාෂාව සම්බන්ධයෙන් සලකා සිංහල, දෙමළ හා ඉංග්‍රීසි යන භාෂාවන් සාමාන්‍ය පෙළ දක්වා ඉගෙනීම අනිවාර්ය කිරීමත් ඊට ප්‍රතිපාදන සැලසීමත් එම ප්‍රතිපත්ති ප්‍රකාශයට ඇතුළත් බවද ඔහු කියා සිටියේය.
මීගමුව කඩොල් උයන කියුපීඩ් උද්‍යානයේදී ප්‍රතිපත්ති ප්‍රකාශය ඊයේ(18) එළිදැක්විණි. දිසානායක මහතා වැඩිදුරටත් කියා සිටියේ බෙදී වෙන්වීමේ මනෝ භාවයෙන් තොර ශ්‍රී ලාංකීය ජාතිය ගොඩ නැඟීමත් සියලු ජාතිකත්වයන් ගේ සමාජ, සංස්කෘතික, ආගමික, ආර්ථික, භාෂාමය හා දේශපාලන විවිධත්වයන් ටත් ඔවුන්ගේ අයිතිවාසිකම් ගෙනළිගෙන ඒවාට ගරු කරන සමාජයක් ඇති කිරීම තම ජාතික බලවේගයේ අරමුණ වන බවය.
ඒ අනුව නිදහස හා ප්‍රජාතන්ත්‍රවාදය යුද්ධයෙන් පීඩා විඳි ජනයාට සාධාරණය, ඉඩම් හා වාසස්ථාන, ජනපදකරණය, භාෂාව, වතුකර ජනතාව ජාතික, සමගිය හා සංහිදියාව, කර්මාන්ත හා කෘෂි කර්මාන්ත යන කරුණුවලට අදාළ යෝජනා 70ක් එම ප්‍රතිපත්ති ප්‍රකාශයට ඇතුළත්ය.
(Lanka Leads)