පාකිස්තානයේ පන්ජාබ් ප්‍රාන්තයේ උද්ගතවී ඇති දරුණු ගංවතුර තත්ත්වය හේතුවෙන් ලක්ෂ දෙකක ජනතාව ඉවත් කිරීමට ප්‍රාන්ත බලධාරීන් පියවර ගත් බව විදෙස් මාධ්‍ය වාර්තා කරයි.
ගංවතුර තත්ත්වය තවදුරටත් උත්සන්න වනු ඇතැයි ආපදා කළමනාකරණ ඒකකය දැනුම්දීමෙන් පසු මෙහෙයුම් කණ්ඩායම් එම ප්‍රදේශයේ ජනතාව ආරක්ෂාකාරීව බෝට්ටුවලින් ඉවත් කළ බව ද වාර්තා වේ. විපතට පත්වූවන් මුදා ගැනීමේ මෙහෙයුම් දුෂ්කර වී ඇති බැවින් පාකිස්තාන හමුදා සෙබළුන් කැඳවීමට ප්‍රාන්ත රජය පියවර ගෙන තිබේ.
පසුගිය ජුනි මාසයේ සිට අඛණ්ඩව ඇදහැලෙන මෝසම් වැසි හේතුවෙන් පන්ජාබ් ප්‍රාන්තය ඇතුළු තවත් ප්‍රාන්ත රැසක ජල ගැලීම් සහ නාය යෑම් රැසක් සිදුවී ඇති අතර, පුද්ගලයන් 800කට අධික පිරිසකට ජීවිත අහිමිවී ඇතැයි විදෙස් මාධ්‍ය වැඩිදුරටත් වාර්තා කරයි. පාකිස්තාන ආපදා කළමනාකරණ ඒකකය ප්‍රකාශ කර ඇත්තේ නිවාස 7,225ක් ගංවතුරට හසුවීමෙන් විනාශ වූ බවය.
පන්ජාබ් ප්‍රාන්තයේ බෝග වගාවට දැඩි හානි සිදුවී ඇතැයි ද, ගොවිපොළ රැසක් ගංවතුරට හසුවීමෙන් ගවයන් හා එළුවන් ඇතුළු සතුන් පන්දහසකට අධික සංඛ්‍යාවක් ද මියගොස් ඇතැයි වාර්තා වේ.
Dinamina