මෙරට නිදහස් සෞඛ්‍ය සේවාවේ භෞතික සම්පත් සංවර්ධනය සඳහා අවශ්‍ය සහය අඛණ්ඩව, ඉදිරියටත් ලබාදෙන බව එක්සත් ජාතින්ගේ ව්‍යාපෘති සේවා සඳහා වන කාර්යාලයේ (UNOPS) දකුණු ආසියානු කලාප අධ්‍යක්ෂ චාල්ස් කැලනන් මහතා අවධාරණය කර සිටියේ ය.
ඒ මහතා මේ බව අනාවරණය කලේ පසුගිය දා සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා සමඟ පැවති හමුවක දී ය. හමුව සෞඛ්‍ය හා ජනමාධ්‍ය අමාත්‍යාංශයේ දී පැවැත්විණි.
මෙරට ක්‍රියාත්මක සෞඛ්‍ය සංවර්ධන ව්‍යාපෘති පිළිබඳව මෙන් ම ඉදිරියට ක්‍රියාත්මක කිරීමට නියමිත සෞඛ්‍ය සංවර්ධන ව්‍යාපෘති පිළිබඳව විශ්ලේෂණය කරමින් අවශ්‍යතාවය පරිදි එම ව්‍යාපෘති කඩිනම් කිරීම, ඉදිරි සැලසුම් සකස් කිරීම වැනි කරුණු මූලික කර ගනිමින් මෙහි දී දීර්ඝ සාකච්ඡාවක් පැවැත්විණි.
වත්මන් රජය ජනතාවාදී රජයක් ලෙස ජනතා අභිලාෂයන් මුදුන්පත් කර ගැනීමට ගන්නා ප්‍රයත්නය අගය කළ අධ්‍යක්ෂ චාල්ස් කැලනන් මහතා මෙරට සමස්ත ජනතාවගේ සෞඛ්‍ය සේවා වගකීම දරන සෞඛ්‍ය අමාත්‍යාංශයට අවශ්‍ය වන්නාවූ සහය නිබඳව ම ඉදිරියටත් ලබා දෙන බව මෙහි දී අමාත්‍යවරයා හමුවේ පවසා සිටියේ ය.
වත්මන් රජය මගින් මෙරට ක්‍රියාත්මක කිරීමට නියමිත ප්‍රාථමික සෞඛ්‍ය සේවා සංවර්ධන වැඩසටහන යටතේ ජනතාවට පහසුවෙන් ළඟා විය හැකි ස්ථාන කේන්ද්‍ර කර ගනිමින් පිහිටුවීමට යෝජිත ප්‍රාථමික සෞඛ්‍ය මධ්‍යස්ථාන දහසක ව්‍යාපෘතිය එක්සත් ජාතින්ගේ ව්‍යාපෘති සේවා සඳහා වන කාර්යාලයේ දකුණු ආසියානු අධ්‍යක්ෂ චාල්ස් කැලනන් මහතාගේ දැඩි ප්‍රසාදයට මෙහි දී ලක්විය.
විශ්ව ගම්මානයක ජීවත්වීමේ දී නවින තාක්ෂණය, දැනුම හුවමාරු කර ගැනීමට, වෘත්තීය කාර්යක්ෂමතාවයට මෙන් ම තම සේවාවන් ලබා දීමේ දී ඩිජිටල්කරණය ඉතාම අත්‍යවශ්‍ය කරුණක් බව පෙන්වා දුන් ඒ මහතා වත්මන් රජය මෙරට තුළ ක්‍රියාත්මක කරන නව ඩිජිටල්කරණ වැඩපිළිවෙළ ද අගය කිරීමට ලක් කෙරිණි.
එක්සත් ජාතින්ගේ ව්‍යාපෘති සේවා සඳහා වන කාර්යාලය සහ ග්ලෝබල් ෆන්ඩ් ආයතනය ඒකාබද්ධව මෙරට රජයේ රෝහල් 30 ක ක්‍රියාත්මක ඩිජිටල්කරණ ව්‍යාපෘතිය පිළිබඳව අධ්‍යක්ෂ චාල්ස් කැලනන් මහතා සහ අමාත්‍යවරයා මෙහි දී දීර්ඝ ව සාකච්ඡා කළ අතර මෙම ව්‍යාපෘතිය සාර්ථකව අවසන් වීමෙන් පසු ප්‍රතිකාර ලබා ගැනීමට පැමිණෙන රෝගී ජනතාවට අඩු කාලයක් තුළ දී ගුණාත්මක සේවාවක් ලබා ගැනීමට හැකියාව ලැබෙන බව මෙහි දී අමාත්‍යවරයා අවධාරණය කර සිටියේ ය.
තම අමාත්‍යාංශයේ ප්‍රමුඛතම වගකීම මෙරට ජනතාවට ගුණාත්මක,තත්ත්වයෙන් උසස් ඖෂධ අඛණ්ඩව මෙරට රෝහල් පද්ධතිය වෙත ලබා දීම බවත්, එම කාර්ය සිදු කිරීමේ දී නොයෙකුත් දුෂ්කරතාවයන්ට මුහුණ දීමට සිදුවන බව මෙහි දී පෙන්වා දුන් අමාත්‍යවරයා මෙරටට අවශ්‍ය ඖෂධ රට තුළ නිෂ්පාදනය කිරීමේ වැඩපිළිවෙළ රාජ්‍ය හා පෞද්ගලික අංශ හරහා නුදුරේ ම ක්‍රියාත්මක කරන බව ද පැවසී ය.
මෙම අවස්ථාවට එක්සත් ජාතින්ගේ ව්‍යාපෘති සේවා සඳහා වන කාර්යාලයේ (UNOPS) සෞඛ්‍ය උපදේශක වෛද්‍ය අන්වර් හම්දානි, එක්සත් ජාතින්ගේ ව්‍යාපෘති සේවා සඳහා වන කාර්යාලයේ (UNOPS) හවුලකාරීත්ව ප්‍රධානී ඇනා යූ ග්යොං කිම්, යටිතල පහසුකම් සහ ව්‍යාපෘති කළමනාකරණ කළමනාකරු ගයාන් මාරන්තොට, ව්‍යාපෘති කළමනාකරු ෂෙරාන් ඩොමිනික් යන මහත්ම මහත්මීන් ද සහභාගි වූහ.