ශ්‍රී ලංකාවේ තිරසාර සංවර්ධන ඉලක්ක, ප්‍රගතිය සහ ඉදිරි ක්‍රියාකාරකම් සම්බන්ධයෙන් පාර්ලිමේන්තු මන්ත්‍රීවරුන් දැනුවත් කිරීමේ විශේෂ වැඩමුළුවක් නියෝජ්‍ය කථානායක අජිත් රාජපක්ෂ මහතාගේ ප්‍රධානත්වයෙන් පසුගියදා (05) පාර්ලිමේන්තුවේදී පැවැත්විණි.
මෙහිදී අදහස් දැක්වූ නියෝජ්‍ය කථානායක ගරු අජිත් රාජපක්ෂ මහතා පැවසුවේ රට තුළ සංවර්ධන ව්‍යාපෘති ක්‍රියාත්මක කිරීමේදී ඊට එරෙහිව ගෙන යන ප්‍රචාර හේතුවෙන් සමස්ත සංවර්ධන ක්‍රියාවලියට බලපෑම් එල්ල විය හැකි බවයි.
එබැවින් නිසි කළමනාකරණයක් යටතේ සංවර්ධන ව්‍යාපෘති සිදුකිරීමේ අවශ්‍යතාවය නියෝජ්‍ය කථානායකවරයා මෙහිදී අවධාරණය කළේය.
වැඩි දෙනෙකුට යහපත සැලසීම උදෙසා ගෙන එන සංවර්ධන ව්‍යාපෘතිවල සුළු අඩුපාඩු අතිශයෝක්තිය නංවමින් ඒවා වැඩි වශයෙන් හුව දැක්වීම තුල එහි අහිතකර ප්‍රතිඵල භුක්ති විඳීමට සිදුවන්නේ රටේ ජනතාවට බව නියෝජ්‍ය කථානායකවරයා මෙහිදී අවධාරණය කළේය.
උමාඔය සහ කොළඹ වරාය නගර වැනි ව්‍යාපෘති පිළිබඳ ව පැතිරුණු වැරදි මත නිසා එවැනි අහිතකර තත්ත්වයන් මතුවූ බවද ඒ මහතා සඳහන් කළේය.
2030 වසර වන විට තිරසාර සංවර්ධන ඉලක්ක සපුරා ගැනීමේදී මුහුණ දෙන අභියෝග සහ ඒවා සාක්ෂාත් කර ගැනීම සඳහා ගත යුතු පියවර පිළිබඳව මෙහිදී තිරසර සංවර්ධන සභාවේ අධ්‍යක්ෂ ජනරාල් නීතිඥ චමින්ද්‍රි සපරමාදු මහත්මිය විසින් මන්ත්‍රීවරයන් දැනුවත් කරන ලදී.
රට ආර්ථික අර්බුදයකට මුහුණ දී සිටින බැවින් මෙම තිරසාර සංවර්ධන ඉලක්ක ජයගැනීමේ කටයුතු නැවත සැලසුම් කළ යුතු බව වැඩමුළුව සඳහා සහභාගි වූ මන්ත්‍රීවරු මෙහිදී පෙන්වා දුන්හ. එමෙන්ම මෙම තිරසාර සංවර්ධන ඉලක්ක සපුරා ගැනීමේදී පාර්ලිමේන්තුවේ කාර්යභාරය පිළිබඳවද සාකච්ජා විය.
තිරසර සංවර්ධන සභාවේ මූලිකත්වයෙන්, පාර්ලිමේන්තුවේ සන්නිවේදන දෙපාර්තමේන්තුවේ මහජන සේවා අංශය විසින් සංවිධානය කරන ලද මෙම වැඩමුළුව සඳහා ආණ්ඩු පක්ෂයේ සහ විපක්ෂයේ මන්ත්‍රීවරයන්, පාර්ලිමේන්තු කාර්යමණ්ඩල ප්‍රධානී සහ නියෝජ්‍ය මහලේකම් චමින්ද කුලරත්න මහතා ඇතුළු නිලධාරීහු පිරිසක් සහභාගි වූහ.