හැන්දෑවෙ අප්පච්චි යනකොට
බල්ල සරමෙන් ඇදල තිබුනා
කෑරලෙක් පොල් අත්තෙ ඉඳලා
පියඹලා විත් ඇඟේ වැදුනා
ගෙදර උළු වහු කඳේ ඉඳගෙන
කකුළ ලිස්සල වැටිල අම්මගෙ
කළේ ළිඳ ළඟ බිඳිල තිබුණා
පාන්දර තුන හමාරට කන
කොකෙක් සද්දෙට අඬල තිබුනා
වෙනද නොඑනා නරි රැ‍ලක් විත්
ගමේ හූ මිටි තියල තිබුණා
නොඑන නින්දක් එක්ක පැඳුරේ
අම්ම මහ රෑ ගෙවල තිබුණා
කණමැදිරි පහ හයක් අඳුරේ
ඇගේ තනියට ඇවිත් තිබුණා
කුඹුර අද්දර ඇළේ සද්දෙට
ගෙම්බො තරගෙට අඬල තිබුණා
වහල හරි මැද බාල්කෙක කළු
දෙබරු මීයක් බැඳල තිබුණා
උදේ දල්වපු පහන අද්දර අම්ම
පඬුරක් බැඳල තිබුනා
අප්පච්චි උන් පැලට ඉහළින්
තනිය බර අඩි තියල තිබුණා.
කල්පනී ගුණවර්ධන