තාත්තගෙ තනපුඩුවෙ එල්ලී

කෙලබොද්දි කිරි වෙනුවට

උබට පිපුණද රාගයේ මල්

පියයුරේ හරි සරුවට

අනික් උන් අම්මට වඳිනකොට

ලෙයක් කිරි කළ ගුණයට

මලක් තියලා වඳින්නම් මං

පිටි කවරෙ එළ හරකට

------------------------------------------------

එකේ ඉඳලා පහේ පන්තිය

වෙනකන්ම මුල් චිත්‍රෙ පවුලක්

උබේ හිස්තැන තියල චිත්‍රය

අඳින එක මට තිවුණු අවුලක්

අහනකොට ටීචර් මගෙන් ඇයි

අම්මගේ තැන කුරුටු බලියක්

කඳුළු උත්තර දුන්නු හින්දා

ටීච තඩියට දැම්ම හරියක්..

-------------------------------------------------

ආදරෙන් රැකබලාගන්නට

උයන්පල්ලන් නැති උයන්වල

පිපුණු මල් වල රොන් උරන්නට

මාන බැලුවා විස බඹර දළ

බඹරු කොච්චර වැරදි කෙරුවත්

දෝස ඇහුවේ අහිංසක මල

අයිතිකරුවන් නොමැති වතුවල

මල් පිපෙන්නට හොඳම නෑ බොල..

--------------------------------------------------

ඵල දරන්නට කලින් ඉඳලා

ගහක් මාසික මල් වරද්දී

යටි බඩේ හැම අඟල ගානම

වේදනා පිහිතුඩු ඇනෙද්දී

රුධිර බින්දුද කඳුළු බින්දුද

වැටුනෙ වැඩියෙන් නැතත් නිච්චී

ඉඩෝරය බලපාපු හින්දා

උබේ දුව කටු පතොක් වෙච්චී..

-------------------------------------------------