මෙවර මහ කන්නයේ අක්කර 8461 පැරෂුට් ක්‍රමයට වගා කිරීම සඳහා ගොවිජන සංවර්ධන දෙපාර්තමේන්තුව විසින් රුපියල් මිලියන 490ක් වටිනා පැරෂුට් තැටි ගොවි ජනතාවට නොමිලයේ ලබා දීම ඊයේ (10) නිල වශයෙන් ක්‍රියාත්මක කරනු ලැබීය.
පැරෂුට් ක්‍රමය යනු වී වගාවේ අස්වැන්න වැඩි කර ගැනීම සඳහා යොදා ගත හැකි නව තාක්ෂණික ක්‍රමයකි. විශේෂයෙන් වී වපුරනවාට වඩා සියයට 50කින් බිත්තර වී යොදාගැනීම අවම කරගත හැකිවේ. අවම පොහොර ප්‍රමාණයක් භාවිත කිරීමට හැකිවීම, වල් මර්දනය සඳහා අමතර මුදලක් වැය නොවීම, හා වල් මර්දනය සඳහා පළිබෝධනාශක යෙදීමට සිදු නොවීම මෙන්ම වැඩි අස්වැන්නක් ලබා ගැනීමට හැකිවීම නිසා මෙම ක්‍රමය ගොවිජනතාවට වාසිදායක ක්‍රමයකි.
මෙම අවස්ථාවට සහභාගි වූ කෘෂිකර්ම අමාත්‍ය මහින්ද අමරවීර මහතා මුල්‍යමය අර්බුදකාරි තත්ත්වයක් පැවතුනත් රජය නව තාක්ෂණය වී වගාව සඳහා හදුන්වා දීමට ගන්නා වැඩසටහන්වලට අවශ්‍ය මුල්‍ය ප්‍රතිපාදන ලබා දෙන බව සඳහන් කළේය.
මෙම පැරෂුට් තැටි වසර 10ක් කන්න 20ක් එක දිගට භාවිත කළ හැකිය. එමෙන්ම අක්කරයකට තැටි 400ක් අවශ්‍ය වේ. මෙම තැටි ලබා දීමේ දී ගොවි ජනතාව එක් තැටියක් මිල දී ගත යුතු අතර රජය විසින් නොමිලයේ තැටි තුනක් ලබා දීමට පියවර ගෙන ඇත.
පැරෂුට් තැටි ලබා දීමේ මෙම වැඩසටහන යටතේ මෙවර මහ කන්නය සඳහා තැටි මිලියන 3.2ක් ගොවීන්ට නොමිලයේ ලබා දීමට සැලසුම් කර ඇතැයි ද අමාත්‍යවරයා සදහන් කළේය.
කෘෂිකර්ම අමාත්‍ය මහින්ද අමරවීර මහතාගේ ප්‍රධානත්වයෙන් මෙම වැඩසටහන කෘෂිකර්ම අමාත්‍යාංශයේ දී පැවැත්වූනු අතර එම අවස්ථාවට ප්‍රවාහන රාජ්‍ය අමාත්‍ය ලසන්ත අලගියවන්න, අමාත්‍යාංශයේ ලේකම් ගුණදාස සමරසිංහ සහ ගොවිජන කොමසාරිස් ජනරාල්. එච්. එම්.ඒ. එල්. අබේරත්න යන මහත්වරු සහ ගොවි නියොජිතයෝ ද සහභාගිවූහ.