මාසික විදුලි බිල දරාගත නොහැකි නම් ඊට විසඳුම බිල් ගෙවීම පැහැර හැරීම නොවන බව විදුලිබල හා බලශක්ති අමාත්‍ය කංචන විජේසේකර මහතා පවසනවා.
විශේෂයෙන්ම විහාරස්ථාන ඇතුළු ආගමික ස්ථානවලට සූර්ය පැනල හරහා විදුලි නිෂ්පාදනය කිරීම හඳුන්වා දීම සුදුසු බව ඇමතිවරයා පවසයි. ඒ සඳහා ආගමික ස්ථානවල ප්‍රධානීන්, ආගමික නායකයන් පෙරමුණ ගතයුතු බවත්, රටේ දේශපාලනය පිළිබඳව මනා අවබෝධයක් සහිත ඕමල්පේ සෝභිත හිමි එවැනි ව්‍යාපෘතියක නායකත්වය ගැනීමට වඩාත් සුදුසු බවත් කංචන විජේසේකර මහතා පවසනවා.
එසේ වුවහොත් විදුලිබල හා බලශක්ති අමාත්‍යවරයා ලෙස තමා ඊට උපරිම දායකත්වය ලබාදෙන බවද සඳහන් කරයි.
මෑතකදී සිදුකළ විදුලි ගාස්තු සංශෝධනය හරහා ආගමික ස්ථානවල විදුලි බිල කිහිප ගුණයකින් ඉහළ ගොස් තිබෙනවා. මේ සම්බන්ධයෙන් ඕමල්පේ සෝභිත හිමි පසුගිය දිනවලදී දැඩිලෙස විරෝධය පළකරමින් කියා සිටියේ තම විහාරස්ථානයේ විදුලි බිල ගෙවිය නොහැකි බවයි. ගෙවිය හැකි වුවද බිල නොගෙවන බවත්, විදුලි ගාස්තු ඉහළ දැමීමට එරෙහිව ජාතික මට්ටමේ විරෝධතාවයක් ආරම්භ කරන බවත් සෝභිත හිමි පවසා තිබිණි.
ඊට ප්‍රතිචාර දක්වමින් කංචන විජේසේකර අමාත්‍යවරයා පවසන්නේ විදුලි බිල ගෙවීම පැහැර හරින්නැයි උපදෙස් දෙමින් ජනතාව කුපිත කිරීම සෝභිත හිමි වැනි ආගමික නායකයෙකුට සුදුසු යැයි තමන් නොසිතන බවයි.
LNW