මානව හිමිකම් තත්ත්වය වැඩි දියුණු කිරීම සඳහා ප්‍රමුඛත්වය දෙනවා
මෙරට ආර්ථික අර්බුදය විසඳීමට ප්‍රමුඛත්වය ලබාදෙන අතර මානව හිමිකම් තත්ත්වය වැඩි දියුණු කිරීම සඳහා එවැනිම ප්‍රමුඛත්වයක් ලබාදෙන බව විදේශ කටයුතු අමාත්‍ය ජනාධිපති නීතිඥ අලි සබ්රි පවසයි.
අමාත්‍යවරයා මේ බව පැවසුවේ අද ස්විට්සර්ලන්තයේ ජිනීවා නුවරදී ආරම්භ වූ එක්සත් ජාතීන්ගේ මානව හිමිකම් කවුන්සිලයේ 51 වන සැසිවාරය අමතමිනි.
එහිදී වැඩිදුරටත් අදහස් දැක්වූ විදේශ කටයුතු අමාත්‍ය ජනාධිපති නීතිඥ අලි සබ්රි.
“මෑතකදී අපි සිදුකළ වෙනස්කම් ප්‍රජාතන්ත්‍රවාදි අගයන් සුරැකීම සඳහා අපේ රජයේ තිබෙන කැපවීම පිළිඹිබු කරනවා. රට තුළ ජනතාවවට සාමකාමීව එක්රැස්වීමට සහ අදහස් ප්‍රකාශ කිරීමට ව්‍යවස්ථාවෙන් ලබා දී ඇති ප්‍රජාතන්ත්‍රවාදී අයිතිය අප රජය තහවුරු කරනවා. එහෙත් ප්‍රචණ්ඩකාරී සහ නීතිවිරෝධි ක්‍රියාවලින් අවසන් වන සිදුවීම් සම්බන්ධයෙන් නීතිය ක්‍රියාත්මක කිරීමට අප පසුබට වන්නේ නැහැ. විශේෂයෙන් ප්‍රජාතන්ත්‍රවාදී නොවන අන්දමින් සිය ඉලක්ක කරා ලඟාවීමට දේශපාලනමය වශයෙන් දරණ ප්‍රයත්නයන්ද මෙම තත්ත්වයන්ට හේතු වී තිබෙනවා. යෝජිත 22 වන ආණ්ඩුක්‍රම ව්‍යවස්ථා සංශෝධනය ප්‍රජාතන්ත්‍රවාදී පාලනය සහ ස්වාධීන ආයතන තවදුරටත් ශක්තිමත් කරලීමට හේතු වේවි. ත්‍රස්තවාදය වැළැක්වීමේ පණත අප පුර්ණ සමාලෝචනයකට ලක්කරන අතර මේ වසරේදි එය ජාත්‍යන්තර ප්‍රමිතීන්ට අනුකූල පරිපුර්ණ ආරක්ෂක නීති පද්ධතියකින් ප්‍රතිස්ථාපනය කෙරෙනවා. ආර්ථික අර්බුදය විසඳීමට ප්‍රමුඛත්වය ලබාදෙන අතර මානව හිමිකම් තත්ත්වය වැඩි දියුණු කිරීම සඳහා එවැනිම ප්‍රමුඛත්වයක් අප ලබාදෙන බැවින් ඒ මඟ ඉදිරියට යාමේදි මානව හිමිකම් මණ්ඩලයේ සැබෑ අවබෝධාත්මක සහයක් අප අපේක්ෂා කරනවා.”
Aruna